ट्राफिक नियम उल्लङ्घन : सांसद बब्लु गुप्ता सवार मोटरसाइकलका चालकलाई ५ सय रुपैयाँ जरिवाना
सिरहा । राष्ट्रिय स्वतन्त्र पार्टी (रास्वपा) का सांसद बब्लु गुप्ता सवार मोटरसाइकलका चालकलाई ट्राफिक नियम उल्लङ्घन गरेको आरोपमा प्रहरीले ५ सय रुपैयाँ जरिवाना गरेको छ।
जिल्ला प्रहरी कार्यालय सिरहाले शुक्रबार जारी गरेको प्रेस विज्ञप्तिअनुसार सिरहा निर्वाचन क्षेत्र नम्बर १ बाट निर्वाचित सांसद गुप्ता सवार बागमती प्रदेश ०२–०२५ प ५२३१ नम्बरको बुलेट मोटरसाइकल का चालक पिताम्बर चौधरी ले ट्राफिक नियम उल्लङ्घन गरेका थिए।
यातायात व्यवस्था ऐन, २०४९ बमोजिम जिल्ला ट्राफिक प्रहरी कार्यालय लहानले चालक चौधरीलाई रु. ५०० जरिवाना गरी छाडिएको प्रहरीले जनाएको छ।
प्रहरीले ट्राफिक नियमको पालना गर्न सबै सवारी चालकलाई आग्रह गर्दै नियम उल्लङ्घन गर्ने जो–कोहीलाई कानुनअनुसार कारबाही गरिने जनाएको छ।
