ईलाममा अटो दुर्घटना हुँदा छ जना घाइते
ईलाम । ईलामको फाकफोकथुम गाउँपालिका–६ हाङ्मासुलीमा अटो दुर्घटना हुँदा छ जना घाइते भएका छन्।
शनिबार साँझ करिब ५ बजे पोखरी–कमेरो भित्री कच्ची सडकखण्डमा मधेस प्रदेश ०३–००३ ह ६९६७ नम्बरको अटो अनियन्त्रित भई सडकबाट करिब दुई मिटर तल खसेको प्रहरीले जनाएको छ। दुर्घटनापछि अटोबाट पेट्रोल चुहिएर आगलागीसमेत भएको थियो।
दुर्घटनामा अटो चालक फाकफोकथुम–६ पोखरी बजारका करिब ३५ वर्षीय लोकबहादुर श्रेष्ठ, इलाम नगरपालिका–७ तिल्केनीकी २७ वर्षीया कविता श्रेष्ठ र उनकी ८ वर्षीया छोरी खुसिका श्रेष्ठ गम्भीर घाइते भएका छन्।
त्यस्तै, २२ वर्षीया दुर्गादेवी श्रेष्ठ र २७ वर्षीया मन्दिरा थापा घाइते भएका छन्। झापाको कनकाई नगरपालिका–माईधारकी करिब ४० वर्षीया रमाकुमारी श्रेष्ठको अवस्था भने सामान्य रहेको प्रहरीले जनाएको छ।
घाइतेमध्ये दुर्गादेवीको अवस्था सामान्य र मन्दिराको अवस्था मध्यम रहेको बताइएको छ। सबै घाइतेको उपचार भइरहेको प्रहरीले जनाएको छ।
