चन्द्र भण्डारी भन्छन्– नेपालमा सबै कम्युनिस्ट मिले कांग्रेसलाई समस्या पर्छ
काठमाडौं । सत्तासाझेदार दल नेपाली कांग्रेसका सांसद डा. चन्द्र भण्डारीले नेपालको राजनीतिमा कम्युनिस्ट एकता भए कांग्रेसलाई समस्या हुने बताएका छन् । आइतबार बसेको संसदीय दलको बैठकमा उनले कम्युनिस्ट एकताको विषयमा धारणा राखेका हुन् ।
“नेपालको अवस्थामा सबै कम्युनिस्ट दल मिले भने कांग्रेसलाई अप्ठ्यारो पर्छ,” भण्डारीको भनाइ उद्धृत गर्दै एक सांसदले भने ।
साउन पहिलो साता बसेको केन्द्रीय कार्यसमितिको बैठक लाइभ गरिएकामा उनले आपत्ति समेत जनाए । उनले लाइभमा एकार्काको कमजोरी अरू पार्टीले देखेको र उनीहरूले फाइदा उठाउन सक्ने उनको भनाइ थियो ।
“केन्द्रीय समिति बैठक लाइभ गरेकोमा मेरो असन्तुष्टि छ, मलाई चित्तबुझ्दो लागेन,” भण्डारीको भनाइ उद्धृत गर्दै ती सांसदले भने, “यो राम्रो भएन, एकार्काको कमी–कमजोरी अरू पार्टीलाई देखाएर कतै फाइदा भएन ।”
उनले नयाँ उदाएका दलहरू पनि कांग्रेसका लागि चुनौती भएको धारणा राखेको ती सांसदले बताए ।
“नयाँ पार्टीहरू आएका छन्, अब हामीले पनि नवीन र फरक ढंगबाट सोच्नुपर्छ । पार्टीले दिने अवसरमा योग्य मानिसहरूलाई प्रोमोट गनुपर्छ,” उनले बैठकमा भने ।
