चन्द्रयान-३ को अवतरणमा समस्या भए यस्तो छ प्लान बी
काठमाडौं । चन्द्रयान–३ चन्द्रमाको दक्षिणी ध्रुवमा सफ्ट ल्यान्डिङ गर्न केही घण्टा मात्रै बाँकी छ तर त्यसअघि इसरोका एक वरिष्ठ वैज्ञानिकले परिस्थिति अनुकूल भएमा मात्र अवतरण गर्ने, अन्यथा नयाँ प्रयास गरिने बताएका छन् ।
समाचार एजेन्सी एएनआईसँग कुरा गर्दै इसरोका वैज्ञानिक नीलेश एम देसाईले भने, ‘चन्द्रयान–३ चन्द्रमामा अवतरण गर्नुभन्दा दुई घण्टाअघि हामी ल्यान्डर मोड्युलको स्वास्थ्य र चन्द्रमाको अवस्था हेरेर निर्णय गर्नेछौं। हामीलाई कुनै परिस्थिति प्रतिकूल लागेमा २३ अगस्टमा अवतरण गर्नुको सट्टा २७ अगस्टमा अवतरण गर्ने नयाँ प्रयास गर्नेछौं ।
तर, कार्यक्रमअनुसार मिसनको विक्रम ल्यान्डर मोड्युल चन्द्रमाको सतहसम्म पुग्ने वैज्ञानिकले विश्वास व्यक्त गरे । तर यदि घटनास्थलमा परिस्थितिमा परिवर्तन भयो भने स्पेस सेन्टरले अवतरण रोक्नेछ।
तालिका अनुसार २३ अगस्टको साँझ ५ बजेपछि इसरोले चन्द्रयान–३ को ल्यान्डर मोड्युललाई चन्द्रमाको दक्षिणी ध्रुवको सतहमा अवतरण गर्ने तयारी गरिरहेको छ । ४० दिनको लामो यात्रापछि चन्द्रयान–३ को ल्यान्डर सतहमा अवतरण गर्ने तयारीमा छ । तर यसको सबैभन्दा महत्त्वपूर्ण प्रक्रिया अवतरण हो, जुन धेरै नाजुक र जटिल छ।
