विराटनगरमा ह्याम्स अस्पतालको सिएमई कार्यक्रम
विराटनगर । ह्याम्स अस्पतालले विराटनगरको बिग होटलमा कन्टिन्युइङ मेडिकल एजुकेसन (सिएमई) कार्यक्रम सम्पन्न गरेको छ ।
मुलुकको सबै प्रदेशमा वर्षमा कम्तिमा एउटा सिएमई कार्यक्रम गर्ने उद्देश्यका साथ धनगढी पश्चात विराटनगरमा उक्त शैक्षिक कार्यक्रम आयोजना गरिएको अस्पतालले जनाएको छ ।
महत्वपूर्ण विधाका अनुसन्धान तथा उपचार पद्धतिसँग सम्बन्धित विषयका बारेमा ह्याम्समा कार्यरत देशकै उत्कृष्ट चिकित्सकहरूद्वारा ज्ञान तथा सीप आदान प्रदान गर्ने उद्देश्यका साथ सो कार्यक्रम गरिएको हो ।
कार्यक्रममा मुटुको चाल सम्बन्धी उपचारमा अग्रणी भूमिका खेल्दै आएका ह्याम्समा कार्यरत वरिष्ठ मुटुरोग विशेषज्ञ डा. रोशन राउतले मुटु कमजोर भएका बिरामीमा प्रत्यारोपण गरिने विशेष पेशमेकरको बारेमा जानकारी दिएका थिए ।
फोक्सो रोग विशेषज्ञ डा. रक्षा पाण्डेले फोक्सोमा हुने जटिल रोग आइएलडी (इन्टरष्टिसियल लङ्ग डिजिज) को नयाँ अनुसन्धान तथा उपचारको बारेमा जानकारी दिएकी थिइन् । साथै कोशी अस्पतालमा कार्यरत पेट रोग विशेषज्ञ डा.भुवनेश्वर यादवले पनि पेट सम्बन्धी रोगको बारेमा जानकारी दिएका थिए ।
