धनकुटामा वर्षाका कारण ४१ करोड बढीको बाली क्षति
धनकुटा । अविरल वर्षाका कारण धनकुटामा कृषि बावी तर्फ करिब ४१ करोड ६८ लाख रुपैँया भन्दा बढीको क्षति भएको छ ।
असोज र कार्तिकमा परेको अविरल वर्षाका कारण मुख्य गरि धान र कोदो बालीमा ठूलो मात्रामा क्षति भएको कृषि ज्ञानकेन्द्र धनकुटाले जनाएको छ । धान बालीमा मात्रै करिब कारण ४१ करोड ५२ लाख ९९ हजार रुपैयाँ बराबरको क्षति भएको छ ।
जसमा काटिसकेको धान चार हजार ५३० दशमलव २४ मेट्रिक टन, पाकिसकेर काट्न बाँकी रहेको सात हजार ७९३ दशमलब ५२ मेट्रिक टन, कलिलो ढलेको धान चार दशमलव आठ मेट्रिक टन र पाक्न बाँकी हरियो धान ८६ दशमलव ४ मेट्रिक टन क्षेति भएको कृषि ज्ञान केन्द्र धनकुटाका प्रमुख नगेन्द्रबहादुर राना मगरले जानकारी दिए ।
त्यसैगरी, जिल्लामा १३.३५ हेक्टर क्षेत्रफलमा लगाइएको ३० दशमलव सात मेट्रिक टन कोदो बाली क्षतिग्रस्त भएको छ । १५ लाख ३५ हजार २४० रुपैयाँ बराबरको कोदो बाली क्षति भएको छ ।
धनकुटामा २ हजार ६०९ हेक्टरमा लगाइएको १२ हजार ४४४ मेट्रिक टन धान र कोदो क्षति हुँदा ४१ करोड ६८ लाख ३४ हजार २४० रुपैयाँ बराबरको क्षति भएको कृषि ज्ञान केन्द्र धनकुटाले जनाएको छ ।
