एमाले धनकुटाद्वारा महाधिवेशन प्रतिनिधि छनौटका लागि अन्तिम मतदाता नामावली प्रकाशन
धनकुटा । धनकुटामा नेकपा एमालेले पार्टीको ११ औं महाधिवेशन प्रतिनिधि छनोटका लागि सार्वजनिक गरेको निर्वाचित कार्यतालिका अनुसार आज अन्तिम मतदाता नामावली प्रकाशन गरिएको छ ।
आज साँझ ५ बजेसम्मका लागि तोकिएको दावी विरोधको समयमा कुनै उजुरी प्राप्त नभएपछि अन्तिम मतदाता नामावली प्रकाशन गरिएको हो । अब, निर्वाचन कार्यतालिका अनुसार १० गते बिहान १० बजेदेखि २ बजेसम्म उम्मेद्वारी मनोनयन दर्ताको समय निर्धारण गरिएको छ ।
८ हजार २ सय ३६ पार्टी सदस्य रहेको धनकुटामा महाधिवेशनका लागि १३ जना प्रतिनिधि छनौट हुने एमाले धनकुटाका अध्यक्ष शिव आङ्लाले जानकारी दिनुभयो । खुलातर्फ ७ जना, महिलातर्फ ४ जना, ४० वर्षमुनिको युवा १ जना र दलित एक जना महाधिवेशन प्रतिनिधि छनौट हुनेछन् ।
सकेसम्म सहमतिबाटै प्रतिनिधि टुङ्गो लगाइने र सहमति जुट्न नसकेको अवस्थामा निर्वाचनबाट प्रतिनिधि छनौट गरिने एमाले धनकुटाका प्रचार विभाग प्रमुख रविन कटेलले जानकारी दिनुभयो । एमालेको केन्द्रिय महाधिवेशन मंसिर २७ देखि २९ गतेसम्म काठमाडौंमा हुँदैछ ।
