सुनसरीमा होटलबाटै ब्राउनसुगरको कारोबार
इटहरी । सुनसरीमा होटलबाटै ब्राउनसुगरको कारोबार भइरहेको सूचनाको आधारमा प्रहरीले चार जनालाई पक्राउ गरेको छ ।
दुहवी नगरपालिका–१०, जगुवा चोकस्थित मुस्कान होटल खाजा घरमा लागूऔषध ओसारपसार भइरहेको भन्ने विशेष सूचनाका आधारमा प्रहरीले गरेको छापामा ब्राउनसुगरसहित चार जनालाई पक्राउ गरेको हो ।
लागूऔषधको कारोबार नियमित रुपमा हुने गरेको भन्ने पुष्टि भएपछि इलाका प्रहरी कार्यालय दुहवीबाट खटिएको टोलीले होटलभित्र छापा मारेको हो।
प्रहरी टोलीले स्थानीय मुस्कान होटल खाजा घरको दक्षिण–पूर्व कुनामा रहेको ४ नं. कटेजमा बसिरहेका चार जनालाई चेकजाँच गर्न खोज्नेबित्तिकै उनीहरूले झोलाबाट शंकास्पद सामग्री फालेर भाग्न खोजेपछि नियन्त्रणमा लिइएको प्रहरीले जनाएको छ। प्रहरीका अनुसार ११.६ ग्राम ब्राउनसुगर बरामद गरिएको छ ।
घटनामा भारतको बिहार, सुपौल–५ बस्ने १८ वर्षीय महमद हैदर, दुहवी–१ बस्ने २६ वर्षीय सिन्टु कुमार पासमान, दुहवी–७ बस्ने २८ वर्षीय सुमित कुमार पासमान र दुहवी–८ बस्ने १८ वर्षीय गौरव झालाई नियन्त्रणमा लिइएको छ ।
प्रहरी स्रोतका अनुसार दुहवी क्षेत्रमा पछिल्लो समय लागूऔषधका ‘ड्रपप्वाइन्ट’का रूपमा उपयोग भइरहेको सूचनालाई ध्यानमा राखेर निगरानी बढाइएको छ।
पक्राउ परेका व्यक्तिहरू भारतीय सीमावर्ती राज्य बिहारबाट नियमित रूपमा आवतजावत गर्दै आएका थिए।-टाकुरा न्यूजबाट
