मोरङको सुन्दरहरैँचामा दुर्घटना हुंदा स्कुटरमा सवार महिलाको मृत्यु
मोरङ । मोरङको सुन्दरहरैँचामा स्कुटरले साइकललाई शुक्रबार दिउँसो ठक्कर दिँदा स्कुटरमा सवार महिलाको मृत्यु भएको छ ।
विराटनगर–विराटचोक सडक खण्डअन्तर्गत सुन्दरहरैँचा नगरपालिका–१ मा को ३६ प ५०९५ नम्बरको स्कुटरले बाटो क्रस गर्दै गरेको साइकललाई दिउँसो २ः४० बजेतिर ठक्कर दिएको मोरङ ट्राफिक प्रहरी प्रमुख इन्स्पेक्टर सन्तोष न्यौपानेले बताए । उनका अनुसार सुन्दरहरैँचा–१ का ३५ वर्षीय उमेश खत्रीले चलाएको साइकललाई ठक्कर दिनसाथ स्कुटर आफैं अनियन्त्रित भएर सडकबाट नालीमा खसेको थियो ।
दुर्घटनामा स्कुटर चालक सुन्दरहरैँचा–१२ का ६७ वर्षीय बुद्धिमान श्रेष्ठ र पछाडि सवार उनकी पत्नी ६४ वर्षीया जीवनकुमारी श्रेष्ठ गम्भीर घाइते भएका थिए । घाइते दुवै जनालाई उपचारका लागि विराटनगरको नोबेल शिक्षण अस्पताल भर्ना गरिएको थियो ।
उपचाररतमध्ये जीवनकुमारीको अपरान्ह ४ः२५ बजेतिर मृत्यु भएको इन्स्पेक्टर न्यौपानेले बताए । उनका अनुसार जीवनकुमारीका पति बुद्धिमानको उपचार भइरहेको छ । दुर्घटनामा साइकल यात्री खत्री भने सकुशल रहेको प्रहरीले जनाएको छ ।
