नेकपा प्रवेश गरेका भनिएका ओखलढुंगाका ९ नेताले भने- हामी एमालेमै छौँ
काठमाडौं । नेकपा एमाले ओखलढुंगा जिल्ला कमिटीका पदाधिकारीसँगै नेकपामा प्रवेश गरेका भनेका कतिपय नेताले खण्डन गर्दै आफूहरूले पार्टी नछाडेको प्रष्टीकरण दिएका छन् ।
अखिल नेपाल महिला सङ्घ अध्यक्ष तथा एमाले सचिवालय सदस्य पशुपति गुरुङ, जिल्ला सदस्य चम्पा राई, जिल्ला कमिटी सदस्य डिल्लीशेर राई, छवि धमला लगायत नेताले आफूहरू नेकपामा नगएको प्रस्ट पारेका छन् ।
त्यस्तै जिल्ला कमिटी सदस्य दामोदर धमलाले विज्ञप्ति निकाल्दै आफू एमाले र सूर्य ध्वजावाहक उम्मेदवारलाई जिताउन लागिरहेको बताएका छन् ।
उनले आफ्नो बारेमा भ्रममा नपर्न समेत आग्रह गरेका छन् । अर्का जिल्ला कमिटी सदस्य झनक कार्कीले पनि आफू एमाले उम्मेदवार र सूर्य चिह्नको पक्षमा रहेको भन्दै सहमतिविपरीत नाम दुरुपयोग नगर्न आग्रह गरेका छन् ।
नेकपा प्रवेश गरेको भनिएका ३७ जनाको लिस्टमा समावेश जिल्ला कमिटी लेखा आयोग अध्यक्ष मोहन ढकाल,प्रदेशका विभाग सदस्य तथा निर्माण व्यवसायी संगठनका दिनेश श्रेष्ठ र कुमार कार्की (जालन्धर) ले पनि एमालेमै रहेको भन्दै नाम दुरुपयोग नगर्न भनेका छन् ।
नेकपा एमालेले केन्द्रीय सदस्य जेनजी पुस्ताकी युवा नेता अस्मिता थापालाई उम्मेदवार बनाएपछि ओखलढुंगाका एमाले नेता अम्बिरबाबु गुरुङ नेकपा प्रवेश गरेर उम्मेदवार बनेका छन् ।
उनीनिकट जिल्ला कमिटीका अध्यक्षसहितका पदाधिकारी शुक्रवार नेकपामा प्रवेश गरेका थिए । प्रवेशीहरुको लिस्टमा नाम नसोधी राखिएको भन्दै ९ जना नेताले असहमति जनाएका हुन् ।
