काठमाडौ फर्किए बालेन
विराटनगर । राष्ट्रिय स्वतन्त्र पार्टी (रास्वपा) का वरिष्ठ नेता तथा झापा निर्वाचन क्षेत्र नम्बर ५ का उम्मेदवार बालेन शाह पूर्वी नेपालका विभिन्न जिल्लाहरूको चुनावी अभियान सकेर शनिबार काठमाडौँ फर्किएका छन् ।
माघ ५ गते मधेस प्रदेशको राजधानी धनुषाको जनकपुरबाट आफ्नो चुनावी अभियान सुरु गरेका शाह धनुषाबाट सीधै झापा पुगेका थिए । झापा पुगेर शाहले माघ ६ गते आफ्नो उम्मेदवारी मनोनयन दर्ता गराएका थिए । त्यसलगत्तै उनी कोशी प्रदेशका पहाडी जिल्ला इलाम, पाँचथर, तेह्रथुम, ताप्लेजुङ, संखुवासभा र धनकुटा जिल्लाका मतदाताहरूसँग सीधा भेटघाट गरेका थिए ।
बालेन आज सुनसरीबाट काठमाडौँ फर्किएका हुन् । कोशी प्रदेशमा रहँदा शाहले चुनावी कार्यक्रमअन्तर्गत कुनै पनि जिल्लामा औपचारिक भाषण वा सभा आयोजना गरेनन् । यस क्रममा उनी ताप्लेजुङको प्रसिद्ध पाथीभरा मन्दिरको दर्शनका लागि समेत पुगेका थिए ।
झापाबाट हिजो काठमाडौं फर्किदा उनका प्रतिस्पर्धी एमाले अध्यक्ष केपी शर्मा ओलीले विमानस्थलमा गरिएको उनको टिममाथीको चेकजाँचलाई अपमान सम्झिए । बालेनको टिमले भने त्यस्तो महसुस नगरेको बताएको छ ।
