धनकुटा जिल्लाभित्र कुनै पनि स्थानमा गांजा खेती नगर्न तथा नगराउन प्रशासनको अनुरोध
धनकुटा,१५ बैशाख । धनकुटा जिल्लाभित्र कुनै पनि स्थानमा गांजा खेती नगर्न तथा नगराउन जिल्ला प्रशासन कार्यालय धनकुटाले अनुरोध गरेको छ ।
प्रमुख जिल्ला अधिकारी विनोद कुमार खड्काद्वारा हस्ताक्षरित जारी सार्बजनिक सुचना मार्फत उक्त अनुरोध गरिएको हो ।
उक्त सुचनामा भनिएको छ – लागु औषध नियन्त्रण ऐन, २०३३ बमोजिम गांजा खेती, ओसार-पसार तथा बेचविखन गर्न पूर्ण रुपमा प्रतिबन्ध लगाईएको व्यहोरा सर्वसाधारण सबैमा जानकारी नै छ ।
उक्त ऐनको व्यवस्था विपरीत कुनै पनि व्यक्तिले गाजा खेती गरेको, ओसार-पसार गरेको वा बेचविखन गरेको पाइएमा प्रचलित कानून बमोजिम कारवाही हुने व्यहोरा विदितै छ।
तसर्थ, जिल्लाभित्र कुनै पनि स्थानमा गाजा खेती नगर्न तथा नगराउन सम्पूर्ण सर्वसाधारणमा अनुरोध गरिन्छ । साथै यस्ता गतिविधि देखिएमा नजिकको प्रहरी कार्यालय वा जिल्ला प्रशासन कार्यालय, धनकुटामा तुरुन्त जानकारी गराउन समेत अनुरोध गरिन्छ ।
कानूनको पालना गर्नु सबैको कर्तव्य भएकोले यो सूचनाको पूर्ण कार्यान्वयनमा सहयोग पु-याउन हुन सबैमा अनुरोध छ।
