रवि–बालेनको एकतामै रास्वपाको भविष्य छ : बाबुराम भट्टराई
चितवन । पूर्वप्रधानमन्त्री बाबुराम भट्टराईले राष्ट्रिय स्वतन्त्र पार्टी (रास्वपा) लाई नेपालको वैकल्पिक राजनीतिको अगुवा शक्तिका रूपमा चित्रण गर्दै सुशासन र समृद्धिको एजेन्डालाई प्रभावकारी रूपमा अघि बढाउन आग्रह गरेका छन्।
रास्वपाको प्रथम महाधिवेशनलाई आइतबार चितवनको भरतपुरमा सम्बोधन गर्दै भट्टराईले छोटो अवधिमै जनताको विश्वास जितेर रास्वपाले उल्लेखनीय राजनीतिक उपलब्धि हासिल गरेको बताए।
‘वैकल्पिक नयाँ राजनीतिको अगुवा शक्ति रास्वपा हो। यस सफलताका लागि म बधाई दिन्छु,’ उनले भने, ‘सुशासन र समृद्धिको प्रतिफल प्रत्येक नेपालीले अनुभूति गर्न पाओस् भन्ने मेरो शुभकामना छ।’
भट्टराईले आफूले लामो समयदेखि वैकल्पिक राजनीतिको आवश्यकता औँल्याउँदै आएको स्मरण गर्दै रास्वपाको उदयलाई त्यस अभियानको महत्वपूर्ण उपलब्धिका रूपमा व्याख्या गरे।
‘मैले करिब एक दशकदेखि वैकल्पिक राजनीतिको पक्षमा पैरवी गर्दै आएको छु। त्यस दृष्टिले हेर्दा, त्यो अभियानको सबैभन्दा ठूलो उपलब्धि रास्वपा नै हो भन्ने लाग्छ,’ उनले भने।
रास्वपाप्रति आफ्नो सकारात्मक धारणा व्यक्त गर्दा विभिन्न टिप्पणीहरू आउने गरेको उल्लेख गर्दै भट्टराईले आफू कुनै व्यक्तिगत स्वार्थ वा पदको आकांक्षाले प्रेरित नभएको स्पष्ट पारे।
‘मैले यस्तो भन्दा कतिपयले ‘ललीपप देखाइएको छ’ भन्छन्। म जीवनको उत्तरार्धमा पुगेको मान्छे हुँ। टाउकोको मूल्य तोकिएको समय पनि भोगेँ, प्रधानमन्त्री पनि भइसकेँ। अब यो उमेरमा केको ललीपप खाने?,’ उनले भने।
पूर्वप्रधानमन्त्री भट्टराईले मुलुकलाई राजनीतिक स्थिरता आवश्यक रहेको उल्लेख गर्दै कम्तीमा आगामी एक दशकसम्म स्थिर राजनीतिक वातावरण कायम हुनुपर्ने धारणा राखे। उनले नयाँ राजनीतिक शक्तिहरूले जनतामा देखिएको आशा जोगाउन जिम्मेवार भूमिका खेल्नुपर्ने बताए।
रास्वपाभित्र देखिने नेतृत्वसम्बन्धी चर्चा र अड्कलबाजीप्रति संकेत गर्दै उनले पार्टीको भविष्य नेतृत्वबीचको एकता र सहकार्यमा निर्भर रहने बताए।
‘रवि ठूलो कि बालेन ठूलो भन्ने बहस हुन सक्छ तर तपाईंहरूको एकतामै रास्वपाको भविष्य सुरक्षित छ,’ उनले भने, ‘पार्टीभित्रको सहकार्य र एकताले नै आगामी पाँच वर्षको यात्रा निर्धारण गर्नेछ।’
भट्टराईले रास्वपाले जनताले दिएको विश्वासलाई संस्थागत गर्दै सुशासन, विकास र समृद्धिको स्पष्ट कार्ययोजना कार्यान्वयन गर्न सके नेपाली राजनीतिमा दीर्घकालीन प्रभाव छोड्न सक्ने विश्वास समेत व्यक्त गरे।
