धनकुटामा ७१ किलो गाँजा सहित दुई जना पक्राउ, अटो र मोटरसाइकल बरामद
धनकुटा । धनकुटाको साँगुरीगढी गाउँपालिका–२ मान्दवा टोलबाट प्रहरीले ७१ किलो ३५ ग्राम गाँजासहित दुई जनालाई पक्राउ गरेको छ।
जिल्ला प्रहरी कार्यालय धनकुटाका अनुसार शुक्रबार राति करिब ११ः५५ बजे इलाका प्रहरी कार्यालय भेडेटारबाट प्रहरी निरीक्षक भीमबहादुर श्रेष्ठको नेतृत्वमा खटिएको टोलीले चेकजाँचका क्रममा को २ ह १२५ नम्बरको अटो (टेम्पो) रोकेको थियो। शंका लागेर गरिएको खानतलासीका क्रममा अटोभित्र प्लास्टिकका पाँच वटा बोरामा प्याक गरी राखिएको तयारी अवस्थामा रहेको ७१ किलो ३५ ग्राम गाँजा बरामद भएको प्रहरीले जनाएको छ।
घटनामा संलग्न रहेको प्र १-०४-००१ प ४७९१ नम्बरको पल्सर मोटरसाइकलसमेत नियन्त्रणमा लिइएको जिल्ला प्रहरी कार्यालय धनकुटाका प्रवक्ता प्रहरी नायव उपरीक्षक हेमन्त भण्डारी क्षेत्रीले जानकारी दिए ।
पक्राउ पर्नेमा साँगुरीगढी गाउँपालिका–२ गैरीगाउँका ३१ वर्षीय शिखर लिम्बु र वडा नं. ३ मादेनका ३२ वर्षीय मदन याखा रहेका छन्।
प्रहरीले गाँजासँगै अटो, मोटरसाइकल, शिखर लिम्बुको रेड्मी मोबाइल फोन, मदन याखाको की–प्याड मोबाइल फोनसमेत बरामद गरेको छ।
घटनाका सम्बन्धमा लागूऔषध नियन्त्रण ऐनअन्तर्गत थप अनुसन्धान भइरहेको जिल्ला प्रहरी कार्यालय धनकुटाले जनाएको छ।
