रेड नोटिस जारी भएका जबरजस्ती करणीका फरार प्रतिवादी ओमनबाट पक्राउ
काठमाडौँ । जबरजस्ती करणी तथा विद्युतीय कारोबार ऐनसम्बन्धी कसुरमा फरार रहेका झापाका एक प्रतिवादीलाई इन्टरपोलको रेड नोटिसका आधारमा ओमनबाट पक्राउ गरी नेपाल ल्याइएको छ।
पक्राउ पर्नेमा झापाको बिर्तामोड नगरपालिका–३ स्थायी घर भएका बिमल राजवंशी रहेका छन्। उनीविरुद्ध जबरजस्ती करणी तथा विद्युतीय कारोबार ऐनसम्बन्धी कसुरमा अनुसन्धान तथा कानुनी कारबाही अघि बढाइएको थियो।
राजवंशीलाई अन्तर्राष्ट्रिय स्तरमा खोजतलास तथा पक्राउ गर्न नेपाल प्रहरी प्रधान कार्यालय, अपराध अनुसन्धान विभागअन्तर्गतको इन्टरपोल शाखाले अनुरोध गरेको थियो। उक्त अनुरोधका आधारमा इन्टरपोल महासचिवालयले सन् २०२६ मे १३ गते राजवंशीविरुद्ध रेड नोटिस जारी गरेको थियो।
रेड नोटिस जारी भएपछि एनसीबी काठमाडौं र एनसीबी मस्कट, ओमनको समन्वय तथा संयुक्त पहलमा राजवंशीलाई ओमनबाट पक्राउ गरिएको हो।
पक्राउ परेका राजवंशीलाई एनसीबी काठमाडौंबाट खटिएको प्रहरी टोलीले कतार एयरवेजमार्फत नेपाल ल्याएको प्रहरीले जनाएको छ। उनी शनिबार बेलुका ४ः२९ बजे नेपाल आइपुगेपछि सम्बन्धित प्रहरीको नियन्त्रणमा लिइएको हो।
नेपाल ल्याइएका राजवंशीमाथि जबरजस्ती करणी तथा विद्युतीय कारोबार ऐनसम्बन्धी कसुरमा थप अनुसन्धान भइरहेको प्रहरीले जनाएको छ।
