नेकपा एमालेका वरिष्ठ नेता नेपालले गरे सरकारको प्रशंसा !
काठमाडौं, फागुन १० । नेकपा एमालेका वरिष्ठ नेता माधवकुमार नेपालले निर्वाचन क्षेत्र निर्धारण आयोग तुरुन्त गठन गर्न सरकारसँग माग गरेका छन् ।
उनले भने–‘स्थानीय तहको निर्वाचनपछि केन्द्रीय संसदको निर्वाचनमा जानुपर्ने भएकाले नै क्षेत्र निर्धारण आयोग गठन र यसले दिने सुझाव आवश्यक पर्छ ।’
व्यवस्थापिका–संसद परिसर नयाँबानेश्वरमा सन्चारकर्मीसँग मंगलबार कुराकानी गर्दै वरिष्ठ नेता नेपालले भने–‘सरकारले स्थानीय तहको निर्वाचन घोषणा गरी जनतामा सकारात्मक सन्देश प्रवाह गरेको छ, अब निर्वाचनको उचित वातावरण बनाउन लाग्नुपर्छ ।’
‘निर्वाचन घोषणा भइसक्यो, अब निर्वाचनलाई कुनै दलले बार्गेनिङ (लेनदेन)को विषय बनाउनु हुन्न, निर्वाचनमा भाग लिइ आफ्नो हैसियत नाप्नुपर्छ’–उनले भने ।
उनले स्थानीय तहको निर्वाचनको मिति घोषणा गरी राम्रो काम गरेको भनी सरकारको प्रशंसा पनि गरे ।
