दुई महिनापछि दोक्लम पुगेको भारतीय सेना फिर्ता, चीनले दियो यस्तो चेतावनी…
काठमाडौ , १२ भदौ । चीन र भुटानको सीमाना दोक्लम पुगेको भारतीय सेना दुई महिनापछि फिर्ता भएको छ । केही भारतीय सञ्चारमाध्यमले दुबै देशका सेना दोक्लमबाट फिर्ता भएको बताए पनि चीनले भने भारतीय सेनामात्र फिर्ता भएको र आफ्नो सेनाले दोक्लममा गस्ती जारी राख्ने जनाएको छ ।
सोमबार भारतीय विदेश मन्त्रालयले विज्ञप्ति जारी गर्दै पछिल्ला केही साता दोक्लम विवादबारे चीनसँग कुटनीतिक तहमा कुराकानी गरेको र दुबै देशले आ–आफ्नो चासो र चिन्ता व्यक्त गर्न सफल भएको बताएको थियो ।
‘यही आधारमा दोक्लममा रहेका सीमा सुरक्षा फौज तुरुन्त फिर्ता गर्न हामी सहमत भयौं र फौज फिर्ताको क्रम जारी छ,’ विज्ञप्तिमा भनिएको छ ।
तर बेइजिङले भने दोक्लममा आएका सबै भारतीय सैनिक फिर्ता भइसकेको र चिनियाँ सेनाले त्यहाँ गस्ती गरिरहेको जनाएको छ ।
चिनियाँ विदेश मन्त्रालयकी प्रवक्ता हुआ चुन्यिङले आफूहरुले दोक्लमका सबै ठाउँमा जाँच गरेको र भारतीय सेना त्यहाँबाट हटिसकेको बताइन्। ‘चिनियाँ सैनिकले सार्वभौमिकताको रक्षाको लागि दोक्लममा गस्ती जारी राख्नेछ,’ उनले भनिन् ।
चीनसँग सीमा जोडिएको भुटानको २६९ वर्गकिलोमिटर दोक्लम क्षेत्र लामो समयदेखि विवादित छ । यसलाई भुटान र चीन दुवैले आफ्नो भूभाग भनेर दाबी गर्दै आएका छन् ।
