अमेरिकाले कोरियाली आकाशमा युद्धक विमान र बम वर्षक विमान उडाएर शक्ति प्रदर्शन गर्यो
एजेन्सी, अमेरिकाले कोरियाली प्रायद्वीपमा सोमबार आफ्ना युद्धक विमान र बम वर्षक विमान उडाएर शक्ति प्रदर्शन गरेको छ । दक्षिण कोरियाली युद्धक विमानका साथ सैन्य अभ्यास गर्दै अमेरिकाले बम आक्रमण गर्ने अभ्यास गरेको हो । अमेरिकाका चारवटा युद्धक विमान र दुईवटा बम वर्षक विमानले कोरियाली प्रायद्वीपमाथि उडान भर्दै उत्तरलाई तर्साउन खोजेका थिए ।
दक्षिण कोरियाली समाचार समिति योन्हापका अनुसार अमेरिकाले युएस चार एफ–३५बी स्टेल्थ जेट र दुईवटा बी–१बी रणनीतिक बमवर्षक विमान प्रयोग गरेको थियो ।
उत्तर कोरिया र अमेरिकाबीच विवाद बढ्दै गएका बेला भएको युद्धाभ्यासले यस प्रायद्वीपमा तनाव अझै बढ्ने अवस्था देखिएको छ । उत्तर कोरियाले शुक्रबार मात्रै जापानी आकाशमाथि क्षेप्यास्त्र प्रहार गरेको थियो । केही साताअघि उत्तर कोरियाले हाइड्रजन बम मिश्रित क्षेप्यास्त्र परीक्षण गरेको थियो । त्यसकै प्रतिउत्तरमा अमेरिकाले आफ्नो शक्ति प्रदर्शन गरेको दक्षिण कोरियाका रक्षामन्त्रीले जानकारी दिएका छन् ।
दक्षिण कोरियाको रक्षा मन्त्रालयद्वारा जारी विज्ञप्तिमा अमेरिकी युद्धक विमान र बम वर्षक विमानले कोरियाली प्रायद्वीपमा उडान भरेर अमेरिका र दक्षिण कोरियाको साझा शक्ति देखाएर उत्तरलाई जवाफ दिएको उल्लेख छ । उत्तर कोरियाका परमाणु र क्षेप्यास्त्र आक्रमणको धम्की रोक्न पनि यस्तो गरेको अनुमान गरिएको छ ।
उत्तर कोरियाले ३ सेप्टेम्बरमा परीक्षण गरेको छैटौं एवं सर्वाधिक शक्तिशाली आणविक परीक्षण र जापानमाथि गरिएको क्षेप्यास्त्र प्रहारपछि अमेरिका आक्रामक रूपमा देखिएको हो । दक्षिण कोरियाले दुई देशबीच आफ्नो साझा शक्ति प्रदर्शन गर्न यस्ता अभ्यास गरिरहने प्योङयाङले स्पष्ट पारेको छ ।
अमेरिकाले प्योङयाङमाथि लगातार दबाब बढाइरहेको छ । हालै संयुक्त राष्ट्रसंघका लागि अमेरिकी स्थायी प्रतिनिधि निक्की हालेले आफ्नो हठ नछोडे उत्तर कोरिया ध्वस्त हुने चेतावनी दिएकी थिइन् ।
