इलाममा ४५२ जनाको जमानत जफत
इलाम । स्थानीय तहको निर्वाचनमा इलामका तीन नगरपालिका र पाँच गाउँपालिकामा चार सय ५२ जनाको जमानत जफत भएको छ । खसेको सदर मतको १० प्रतिशत नल्याउने उम्मेद्वाहरुको जमानत जफत भएको हो ।
इलाम नगरपालिकामा प्रमुखमा पाँच जना, उपप्रमुखमा चार जनासहित ९५ जनाको जमानत जफत भएको छ । यस्तै माई नगरपालिकामा प्रमुखमा तीन, उपप्रमुखमा एक गरी ६८ जना, सर्योदय नगरपालिकामा प्रमुखमा ४, उपप्रमुखमा ४ गरी ९५ जनाको जमानत जफत भएको छ ।
चुलाचुली गाउँपालिकामा अध्यक्ष सात, उपाध्यक्ष तीन सहित ६२ जना, फाकफोक थुममा अध्यक्ष चार र उपाध्यक्ष चार गरी ४५ जना, माइजोगमाईमा अध्यक्ष दुई, उपाध्यक्ष दुई गरी २७ जना, रोङ गाउँपालिकामा अध्यक्ष ६ जना, उपाध्यक्षमा २ जना गरी ३७ जना र सन्दकपुर गाउँपालिकामा अध्यक्ष चार जना, उपाध्यक्ष दुई जना उम्मेद्वार गरी २३ जनाको जमानत जफत भएको निर्वाचन कार्यालयले जनाएको छ ।
देउमाई नगरपालिका र माङसेबुङ गाउँपाकिलाको विवरण भने आउन बाँकी रहेका निर्वाचन कार्यालयलले जनाएको छ ।
नेकपा माओवादी केन्द्रको उम्मेद्वारहरुमा माई नगरपालिकाका प्रमुखका उम्मेद्वार भक्तबहादुर लुङ्गेली उपप्रमुखमा रञ्जना थापा र चुलाचुली गाउँपालिकाको उपाध्यक्षमा धनादेवी पोख्रेल बाहेक आठ वटै स्थानीय तहका प्रमुख, उपप्रमुख र अध्यक्ष, उपाध्यक्षका उम्मेद्वारहरुको जमानत जफत भएको छ ।
संघीय समाजवादी, राप्रपा, संघीय लोकतान्त्रिक राष्ट्रिय मञ्च, राष्ट्रिय जनमुक्ति पार्टी लगायत नौं वटा दल र स्वतन्त्रका उम्मेद्वारहरुले निर्वाचनमा भाग लिएका थिए । इलाम नगरपालिका वडा नं. १ का राप्रपाका वडा सदस्यका उम्मेद्वार गोवरधन बस्नेतले एक मत पनि ल्याएनन् । दोस्रो कम मत भने राप्रपाका इन्द्रबहादु राई र संघीय समाजवादी फोरमकी विष्णु माया केरुङ्गले ३-३ मत ल्याएका छन् । स्थानीय तहको निर्वाचनमा इलाममा १५ सय ९४ जनाले उम्मेद्वारी दिएका थिए ।
