राष्ट्रपति र उपराष्ट्रपतिको सेवासुविधा बढ्यो, कसको तलब कति ?
काठमाण्डौ, ९ साउन । सरकारले राष्ट्रपति र उपराष्ट्रपतिको पारिश्रमिक तथा सेवासुविधा बढाउन बनेको विधेयक संसद्मा प्रस्तुत गरेको छ ।
यो विधेयक पारित भएपछि राष्ट्रपतिको मासिक पारिश्रमिक एक लाख ५० हजार चार सय ५० र उपराष्ट्रपतिको एक लाख आठ हजार ३० रुपैयाँ पुग्नेछ ।
यसअघिको प्रचण्ड नेतृत्वको सरकारले गत जेठ १६ मा राष्ट्रपति र उपराष्ट्रपतिको पारिश्रमिक तथा सुविधा सम्बन्धमा व्यवस्था गर्न बनेको विधेयक संसदमा दर्ता गराएको थियो ।
राष्ट्रपति र उपराष्ट्रपतिले पाउने दैनिक भत्ता र बिमामा समेत भारी वृद्धि गरिएको छ । स्वदेशमा भ्रमण गर्दा ३३ सय र विदेश भ्रमण गर्दा २५० अमेरिकी डलर पाउने व्यवस्था विधेयकमा उल्लेख छ ।
अस्ट्रेलिया, न्युजिल्यान्ड, अमेरिका, क्यानडा, कुवेत, कोरिया, जापान, हङकङ, रुस, कतार, जाम्बिया, युएई, सिंगापुर, लेबनान र बहराइनको भ्रमणमा ३३ प्रतिशत थप रकम दिने व्यवस्था विधेयकमा गरिएको छ । – काठमाण्डू टुडेबाट ।
