उल्टियो नजिता भरतपुरमा, देवीलाई रेणुले पछि पार्दा मतगणना स्थगित
चितवन २१ साउन । चितवनको भरतपुर महानगरपालिकाको मतगणना अन्तिम चरणमा पुग्दै गर्दा नजिता रोचक बनेको छ । मतगणनाको सुरुवातदेखी नै अगाडि रहेका नेकपा एमालेबाट मेयरका उम्मेदवार देवी ज्ञवालीलाई पछि पार्दै माआवादी केन्द्रकी उम्मेदवार रेणुले झिनो अग्रता लिएकी छिन् ।
वडा नम्बर २० को २ हजार मत गणना हुँदा एमालेका ज्ञवाली माओवादी–कांग्रेस उम्मेदवार रेणु दाहालभन्दा ७५ मतले पछि परेका छन् । २० नम्वर वडाको मतगणना सुरु हुँदा रेणु २ सय २१ मतले पछि थिइन् ।
वडा नम्बर २० मा ३ हजार ३ सय २ मत खसेकोमा अब १ हजार २ सय २ मत गन्न बाँकी छ ।
मतगणनास्थलमा खटिएका नेकपा एमालेका प्रतिनिधि खाजा खान भनेर निस्किएपछि केहीबेरका लागि मतगणना रोकिएको छ । उनीहरु फर्किए पछि मतगणना पुनः सुरु हुने मुख्य निर्वाचन अधिकृतको कार्यालयले जनाएको छ ।
