बर को रुख फेदमा मुर्ति अकारकै ढुंगा भेटियो, भगवान प्रकट भएको भन्दै हेर्ने र पूज्नेको घुइँचो
जनकपुर, भदौ २० । धनुषाको बटेश्वर गाउँपालिका–१ भूचक्रपुरको धुमासन टोलमा बरको रुखको फेदमा मुर्ति आकारकै ढुंगा फेलापरेपछि हेर्नको घुँइचो लागेको छ । स्थानीय बासिन्दाले भगवान महादेव प्रकट भएको भन्दै मेला र पूजापाठ गरेका छन् ।
धुमासन गाउँभन्दा पाँच सय मिटर पूर्व चौरमा सार्वजनकि जग्गामा रहेको झण्डै पाँच दशक पुरानो बरको रुखमा मुर्ति आकारकै ढुंगा फेला परेको हो । गएको मंगलबार सार्वजनिक कामका लागि स्थानीय बासिन्दाले बरको रुख काट्न गएका थिए । त्यसपछि त्यहाँको झारपात सरसफाई गर्दा रुखको फेदमा भित्रबाट मुर्ति आकारकै ढुंगा फेलापरेको स्थानीय बासिन्दा इन्दल महतोले बताउनुभयो ।
उहाँका अनुसार त्यस दिनदेखि मान्छेहरुले देउता प्रकट भएको भन्दै पूजाआजा गर्ने गरेका छन् । अहिले त्यहाँ दर्शन गर्नेहरुको घुइँचो लाग्ने गरेको छ । – शैलेन्द्र महतो / उज्यालो ।
