राजपाका महामन्त्री एवं सांसद नै एमाले प्रवेश गर्दै
काठमाडौं, २२ भदौ । राष्ट्रिय जनता पार्टीका महामन्त्री एवं सांसद जंगीलाल राय एमालेमा प्रवेश गर्ने भएका छन् ।
टिकट वितरणमा आफ्ना कार्यकर्तालाई पन्छाईएपछि पार्टीको महामन्त्री पद छोडेको घोषणा गरेका असन्तुष्ट राय एमाले प्रवेश गर्ने तयारीमा लागेका हुन् ।
२ नम्बर प्रदेशको स्थानीय तहको निर्वाचनलगत्तै सांसद् पदबाट राजीनामा दिएर एमाले प्रवेश गर्ने रायले बताएका छन् । प्रवेश गर्दा कार्यकर्ता पनि लिएर जानु पर्ने भएकोले अहिले कार्यकर्ताका लागि चुनावमा खटिने उनको भनाई थियो ।
सर्लाही क्षेत्र नम्बर ५ बाट प्रत्यक्ष निर्वाचित सांसद रायले एमालेमा प्रवेश गर्नेबारे माथिल्लो तहका साथै जिल्ला तहका नेताहरुसँग समेत कुराकानी भइरहेको बताए । यसअघि राजपाका सहमहामन्त्री अनिस अन्सारी र कोषाध्यक्ष अनिता यादव एमालेमा प्रवेश गरेका थिए ।
