लुम्बिनीमा पहिलोपटक बौद्ध ग्रन्थ त्रिपिटक वाचन, २० देशका करीब एक हजार भिक्षु सहभागी हुने
काठमाडौँ । अखिल नेपाल भिक्षु महासङ्घले बुधबार लुम्बिनीमा पहिलोपटक बौद्ध ग्रन्थ त्रिपिटक वाचन गर्ने भएको छ ।
यसका लागि विभिन्न २० देशका करीब एक हजार भिक्षु सहभागी हुने भएका छन् । बौद्ध साहित्यमा महत्वपूर्ण बौद्धग्रन्थका रुपमा लिइएको त्रिपिटक वाचनका लागि अन्तर्राष्ट्रिय तहबाट भिक्षुको व्यवस्था गरिएको महासङ्घले जनाएको छ ।
अभिधम्म पिटक, सुत्त पिटक र विनय पिटकलाई त्रिपिटक भनिन्छ । यी तीन वटालाई बौद्ध साहित्यमा ठूलो ग्रन्थका रुपमा लिइएको छ । अभिधम्ममा बौद्ध दर्शनको पक्षलाई समेटिएको छ भने सुत्तमा सूत्रहरुको व्यवस्था गरिएको छ । त्यसैगरी भिक्षुहरुका आचरणलाई विनयमा राखिएको छ ।
यही कात्तिक २८ देखि ३० गतेसम्म वाचन गरिने त्रिपिटक पाली, देवनागरी, थाईलगायत भाषाको व्यवस्था गरिएको महासङ्घका सदस्य भिक्षु तपस्सी धम्मले जानकारी दिनुभयो । करीब ४० लाख खर्चमा सम्पन्न हुने उक्त कार्यक्रमको शुभारम्भ संस्कृति, पर्यटन तथा नागरिक उड्डयनमन्त्री रवीन्द्र अधिकारी गर्नुहुने आयोजकले जनाएको छ ।
त्रिपिटक बुद्धले दिएको ज्ञान र शिक्षाको सार सङ्ग्रहित मानिन्छ । लुम्बिनीमा पहिलो पटक वाचन गर्न लागिएको उक्त कार्यक्रमले धार्मिक पर्यटक वृद्धि गर्ने अपेक्षा लिइएको छ । शाक्यमुनि बुद्धकै समयमा अभिधम्म र सुत्त पिटक विकास भएको हो भने विनयपिटक सम्राट अशोकको पालामा लेखिएको बौद्ध ग्रन्थ हो ।
