नेपालमा मात्रै यस्तो हुन्छ : नेता खोज्न रियालिटी शो, रंगशाला बनाउन सुन्तला बेच्छन्
काठमाडौं । मुलुक लोकतान्त्रिक गणतन्त्रमा प्रवेश गरेको छ । नेताहरु राजनीतिक संघर्ष सकियो, अब मुलुकको विकास र समृद्धिका लागि काम गर्नुपर्ने बताउँदै आएका छन् । संविधान सभाबाट जारी भएको संविधान कार्यान्वयनका क्रममा तीन तहमा जनताको सरकार छ ।
अब मुलुक समृद्धि र विकासतर्फ उन्मुखको भएको सत्तारुढ दलका नेता बताउँछन् । र यही बेला पत्रकार नेताको खोजीका लागि रियालिटी शो चलाउने तयारीमा छन् । कलाकार विकासका लागि खर्च जुटाउन ठेलामा सुन्तला बेच्न लागेका छन् । यी दुई विषयले केही दिनयता चर्चा बटुलिरहेको छ ।
कुरा हो, चर्चित टेलिभिजन प्रस्तोता रवि लामिछानेले ‘द लिडर शो’ चलाउने तयारीमा छन् । केही दिनअघि घोषणा गरिएको यो रियालिटी शोको ५ जना निर्णायक मध्ये पूर्वप्रधानमन्त्री डा. बाबुराम भट्टराई, पूर्वप्रधानन्यायाधीश सुशीला कार्की र साझा पार्टीका संयोजक रवीन्द्र मिश्र छन् । दुई जनाको नाम टुंगो लाग्न बाँकी छ । नेताको खोजी गर्न सो रियालिटी शो गर्न लागिएको भनिएको छ ।
विश्वमा संघर्ष र राजनीतिक तथा सामाजिक आन्दोलनबाट नेता जन्मिन्छन् । तर, नेपालमा भने नेताको खोजीमा रियालिटी शो गर्नुपरेको छ । यस रियालिटी शोको विजेताले कार, अपार्टमेन्ट र २० लाख नगद पुरस्कार पाउने छन् ।
‘द लिडर शो’को चर्चासँगै गौतम बुद्ध अन्तर्राष्ट्रिय क्रिकेट रंगशाला निर्माणका लागि आर्थिक संकलनको विषयले बहस पाइरहेको छ । विश्वमा कलाकार कला प्रस्तुत गर्छन्, तर नेपालमा भने कलाकार मुलुकको विकास र समृद्धिमा लागिपरेका छन् । चारवटा एकीकृत नमुना बस्ती बनाएर वाही वाही कमाएका कलाकार सीताराम कट्टेल धुर्मुस अहिले चितवनको भरतपुरमा गौतम बुद्ध अन्तर्राष्ट्रिय क्रिकेट रंगशाला बनाउन लागिपरेका छन् ।
तीन अर्ब रुपैयाँ भन्दा बढी लागत लाग्ने अनुमान गरिएको सो रंगशाला निर्माणका लागि धुर्मुस आर्थिक संकलनमा जुटेका छन् । विदेश तथा स्वदेशमा रहेका नेपालीको सहयोगले चारवटा एकीकृत नमुना बस्ती बनाएका उनले विश्वभर रहेका नेपालीसँग आर्थिक सहयोगका आह्वान गरेका छन्, रंगशाला बनाउन ।
अरु देशमा देशको विकासमा सरकारले नेतृत्व लिन्छ, आर्थिक सहायता जुटाउँछ । तर, नेपालमा कलाकार रंगशाला बनाउन विश्भर रहेका नेपालीमा सहयोगका अपिल गर्छन् । यससँगै रंगशाला निर्माणाधीन क्षेत्रमा धुर्मुस रंगशाला निर्माणकै लागि आथिक सहयोग जुटाउन भन्दै ठेला सुन्तला बेचेको तस्विर र भिडियोले सामाजिक सञ्जाल रंगिएको छ ।
सरकारले केही रकम दिएको छ भने स्वदेशमै रहेका उद्योगीहरुले आर्थिक सहयोग गरेका छन्, रंगशाला बनाउन । तर, तीन अर्बभन्दा बढी लाग्ने भएकाले धुर्मुस जे जसरी आर्थिक संकलन हुन्छ, सोही गरिरहेका छन् ।
