प्रत्येक वडामा राहत वितरण गर्दै धनकुटाको पाख्रीबास नगरपालिका
धनकुटा खबर, चैत २५ । धनकुटाको पाख्रीवास नगरपालिकाको ६ र २ नं वडामा आजवाट लकडाउन प्र,भावित विपन्न श्रमिक, मजदुर परिवारलाई राहत वितरण गर्न शरु गरिएको छ । जसअनुसार आज ६ नं वडाका विपन्न श्रमिक,मजदुर १ सय ८० घरपरिवारलाई राहत वितरण गरिएको छ ।
पाख्रीवास नगर प्रमुख वृष वहादुर राई, प्रमुख प्रशासकीय अधिकृत डिक वहादुर राई,वडाध्यक्ष दल वहादुर तामाङ लगायतले ती परिवारलाई प्रति-परिवार ३० केजी चामल,२ केजी दाल, १ केजी नुन र १ थान सावुन लगायतका सामाग्री प्रदान गरेको वडा सचिव खेम चन्द्र वस्तिले जानकारी दिनुभयो ।
त्यस्तै वडा नं २ को झण्डै १ सय १५ घर परिवारलाई पनि राहत प्रदान गरिएको छ । वडा भित्रका १ सय ९० घरपरिवारलाई राहत वितरण गर्ने वडाको लक्ष अनुसार आज उल्लेखित संख्याका परिवारलाई राहत प्रदान गरिएको र बाँकीलाई भोलि प्रदान गरिने २ नं वडाध्यक्ष तोर्ण खपाङ्गी मगरले जानकारी दिनुभयो ।
त्यस्तै ४ नं वडाको पनि सम्पूर्ण राहत सामाग्री आज साँझ सम्म आइसक्ने वडाध्यक्ष सोवित निरौलाले वताउनुभएको छ । अन्य १, ७, ३, ५, ८, ९, १० लगायतका वडाहरुले पनि तत्काल राहत वितरणको काम शूरु गर्ने नगरले जनाएको छ ।
