वैदेशिक रोजगारीका लागि कम्वोडिया गएका धनकुटाका ३ सहित २७ जना नेपाली विगत १० महिना देखी अलपत्र
मंशिर १३,धनकुटा । धनकुटाको सागुरीगढी र सहिदभुमी गाउँपालिकाका क्रमश हरि कुमार राई, किसन राई र स्नेहा राई को माध्यमबाट वैदेशिक रोजगारीका लागि कम्वोडिया गएका धनकुटाका ३ सहित २७ जना नेपाली विगत १० महिना देखी अलपत्र परेकाछन् ।
वैदेशिक रोजगारीका लागि चाईना कन्ट्रक्सन (CSCEC) गएका धनकुटाको चुङमाङका मेहेर मान तामाङ, छिन्ताङका सन्तोष राई र धनकुटा पात्ले खोला छेउका मणिक राई सहित २७ जना नेपालीले आफुहरु विगत १० महिना देखि कम्वोडिया मै अलपत्र परेको वताएका हुन् ।
एजेन्टहरुले आफुहरुलाई महिनाको एक लाख २० हजार तलव हुन्छ भनि प्रति व्यक्ति ४ लाख देखी ५ लाख ५० हजार सम्म तिर्न लगाएर मेसन कामको लागि पठाएको पीडित मेहर मान तामाङले वताउनुभयो ।
कम्वोडिया पुगेर आफुहरुले दुई तीन महिना काम पनि गरेको तर तलव भने नपाएको तामाङको भनाई छ । कामको तलव पनि नपाएपछि काम छाडेर आफुहरु एनआरएन को सहयोगमा वसिरहेको तामाङले वताउनुभयो । अहिले आफुहरुलाई विदेश पठाउने एजेन्टहरु सँग सम्पर्क समेत नरहेको पीडितहरुको भनाई छ ।
पीडितहरुले आफुहरुलाई ठगेको भन्दै आफ्नो लागत रकम सम्वन्धित एजेन्टहरुले फिर्ता दिनु पर्ने र शकुशल नेपाल फर्कन पाउनु पर्ने माग गरेका छन् । पीडित अन्य नेपालीहरुमा झापा,सुनसरी लगायत स्थानका रहेका छन् ।
