सामुदायिक रेडियो मेलौली नियमित प्रसारणमा
बैतडी, १ चैत । बैतडीको तल्लोस्वराडमा स्थापना भएको सामुदायिक रेडियो मेलौली एफएम १०१.२ मेगाहर्जले आफ्नो नियमित प्रसारण यात्रा शुरु गरेको छ ।
मेलौली सूचना तथा सञ्चार समूहद्वारा सञ्चालित रेडियो मेलौली आज एक औपचारिक कार्यक्रमका साथ नियमित प्रसारण यात्रा शुरु गरेको रेडियोका स्टेशन म्यानेजर लक्ष्मण बिसीले जानकारी दिनुभयो ।
कार्यक्रममा मेलौली नगरपालिलिकाका प्रमुख कृष्णसिंह नायकलगायतका जनप्रतिनिधिको सहभागिता रहेको थियो । कार्यक्रममा नगरप्रमुख नायकले रेडियोले समावेशी र निष्पक्षरुपमा अगाडि बढ्नुपर्नेमा जोड दिनुभयो ।
जिल्लाको तल्लोस्वराड क्षेत्रअन्तर्गत मेलौली नगरपालिका–१ मा स्थापना गरिएको रेडियो मेलौलीले तीन महिनाको परीक्षण प्रसारणपश्चात् नियमित यात्रा शुरु गरेका हो ।
रेडियोले नियमित प्रसारण यात्रा शुरु गरेपश्चात् हरेक घण्टा ताजा समाचार, विभिन्न मनोरञ्जनात्मक कार्यक्रम, समसामहिक विषयमा गरिएको बहस, सूचनालगायत आवाजविहीनको आवाज बन्ने स्टेशन म्यानेजर बिसीले बताउनुभयो ।
दुर्गम ठाउँमा विभिन्न आरोह र अवरोह पार गर्दै स्थापना गरिएको रेडियोले विशेष गरेर यस क्षेत्रका हरेक पर्यटकीय ठाउँको विकास र प्रवद्र्धन गर्न विभिन्न माध्यमबाट प्रचारप्रसार गर्ने, स्थानीय भाषा, संस्कृतिको संरक्षण गर्ने, पिछडिएका वर्गलाई अगाडि ल्याउन मद्दत गर्ने, जनताको हितका लागि कदम चाल्ने र यसका लागि यस क्षेत्रका बासिन्दाका साथ सहयोग आवश्यक हुनुपर्ने रेडियोले जनाएको छ ।
‘समृद्धि र विकासका लागि समावेशी आवाज, आफ्नै बोली आफ्नै शैली’ भन्ने मूल नाराका साथ रेडियो सञ्चालनमा आएको हो । रेडियो अबदेखि बिहान ५ देखि राति ११ बजेसम्म १८ घण्टे प्रसारण हुनेछ । सय वाट क्षमता भएको रेडियोले गत पुस १० गतेदेखि परीक्षण प्रसारण शुरु गरेको थियो । (रासस)
