महालक्ष्मी नगरपालिका र सबै वडा कार्यालयबाट प्रवाह हुने अत्यावश्यक बाहेकका सेवा वन्द
धनकुटा । धनकुटाको महालक्ष्मी नगरपालिका र सबै वडा कार्यालयबाट प्रवाह हुँने अत्यावश्यक बाहेकका सेवा वन्द हुने भएको छ ।
कोरोना भाईरसको संक्रमणबाट सर्तकता अपनाउनका लागि वैशाख २७ देखि जेठ २ गतेसम्म एक साताका लागि अत्यावश्यक बाहेकका सेवा बन्द गर्न लागिएको हो । कोरोना भाइरस (कोभिड–१९) सम्बन्धि पूर्व तयारी तथा प्रतिकार्य सम्बन्धि आवश्यक व्यवस्था गर्न गठित समन्वय समितिको बैठकले अत्यावश्यक बाहेकका सेवा एक साता बन्द गर्ने निर्णय गरेको हो ।
नगरपालिकाका प्रमुख प्रशासकीय अधिकृत बसन्त गिरीले आईतवार एक सूचना जारी गरी यस अवधिमा प्राथमिक स्वास्थ्य केन्द्र, स्वास्थ्य चौकी, नगर स्वास्थ्य केन्द्रवाट प्रवाह हुने स्वास्थ्य सेवा नरोकिने जनाउनु भएको छ । फोहोरमैला व्यवस्थापन, एम्बुलेन्स, नगर प्रहरी, खानेपानी, अति जरुरी कामको लागि सवारी पास सिफारिस र विपद् व्यवस्थापनको काम पनि सुचारु हुनेछ । ती वाहेक अन्य सबै सेवा एक साता बन्द हुने नगरपालिकाले जनाएको छ ।
कोरोना संक्रमण फैलनबाट जोगिन भिडभाड, भोज भतेर, बैठक, गोष्ठि, चाडपर्व मनाउँने जस्ता जमघट हुँने गतिविधि नगर्न नगरबासीलाई आग्रह गरिएको छ । नगरपालिकाका मेयर पर्शुराम नेपालले घर बाहिर निस्किदा अनिवार्य मास्क लगाउँन, सामाजिक दुरी कायम गर्न र सरकारले जारी गरेको स्वास्थ्य मापदण्ड पालना गर्न नगरबासी सम्पूर्णलाई आग्रह गर्नुभएको छ ।
