नगर सभामा तोडफोड गर्नेलाई कारवाही र क्षतिपूर्ति माग, अध्यक्ष निरौलालाई साधारण सदस्य समेत नरहनेगरी कारवाही
नारायण कुमार राई,धनकुटा । असार १० गते पाख्रिबास नगरपालिकाको आठौ नगर सभामा आक्रमण गरी भौतिक सामाग्री तोडफोड गर्नेहरुमाथि कारवाहीको माग गरिएको छ ।
शनिबार पाख्रिबास नगरपालिका र नेकपा एमाले पाख्रिबास नगर कमिटीले छुट्टछुट्टै पत्रकार सम्मेलन मार्फत् बिज्ञप्ति जारी गरेर कारवाहीको माग गरेका छन् ।
नगरपालिकाले मेयर बृषबहादुर राईले पत्रकार सम्मेलन गरेर नगर सभा सदस्यहरुलाई हातपात गर्नेरुलाई कारवाही र ५ लाख बराबर बढीको भौतिक क्षतिको परिपूर्ति गराउन सम्बन्धित प्रशासन र प्रहरीलाई बिज्ञप्ति मार्फत् अपिल गरेको छ ।
मेयर राईले बजेट बिनियोजनमा नगरको वडा न.४ को असहमति भएकोले उनीहरुको असहमति नगर सभामा राखेर टुंग्याउने भनिएपनि आफूहरुमाथि आ’क्रमण भएको बताउनुभयो ।
तोकीएको समयमा वडाको बजेट तथा कार्यक्रम नआएपछि स्थानिय सरकार संचालन ऐन अनुसार वडाका बहुमत सदस्यहरुले सिफारिस गरेको योजना समावेश गरिएको मेयर राईले जानकारी दिनुभयो ।
यस सन्दर्भमा नगरले असार ३ गते बजेटको सिलिङ दिएर ६ गते सम्म वडाको योजना तथा कार्यक्रम पेश गर्न परिपत्र गरेको थियो ।
तर पटक–पटक आफूहरुले बैठक बस्न अनुरोध गरेपनि वडा नं.४ का वडा अध्यक्ष सोभित निरौलाले बेवास्ता गरेको वडा सदस्य कृष्ण मायाँ खड्काले जानकारी दिनुभयो ।
अन्तिम समय ९ गते सम्म पनि पटक–पटक बैठक बोलाउँने अनुरोध गर्दा पनि बैठक नबसेपछि आफूहरुले बहुमत सदस्यहरुले निर्णय गरेर बाध्यत्मक परिस्थितिमा नगरमा योजना कार्यक्रम पेश गर्नुपरेको खड्काले बताउनुभयो ।
बैठकमा सहमति गरेको बिषयलाई लिएर निरौलाले आफूलाई धम्किपूर्ण ब्यबहार गरेको र कालो मोसो लगाई दिने भनेर गाउँमा हल्ला गरेर मानसिक पिंडा दिएको वडा सदस्य शान्तिमायाँ परियारले रुदै गुनासो पोख्नुभयो ।
उता मेयर राईले पनि वडामा देखिएको समस्यालाई अध्यक्ष र सदस्यहरुको योजनालाई मिलाएर सभाबाट समधान गर्ने भनिएपनि आफूहरु माथि आ’क्रमण भएको जानकारी दिनुभयो ।
यस घटनालाई लिएर उता नेकपा एमाले पाख्रिबास नगर कमिटीले वडा नं.४ का वडा अध्यक्ष सोभित निरौलालाई पार्टीको साधारण सदस्य समेत नरहने गरी कारवाही गरेको छ ।
पाटीका नगर अध्यक्ष शान्तिराम गौतमको अध्यक्षतामा पत्रकार सम्मेलन गरेर नेकपा एमाले पाख्रिबास नगर कमिटीले उक्त कुराको जानकारी दिएको हो ।
‘नेकपा एमालेबाट वडा अध्यक्षमा निर्वाचित निरौलालाई पार्टीको साधारण सदस्य समेत नरहनेगरी कारवाही गरिएको ब्यहोरा जानकारी गराईन्छ ।’–बिज्ञप्तिमा उल्लेख छ ।
बिपक्षीहरु संग साँठगाँठ गरी पाटी बिरुद्धमा लागेर सार्वजनिक सम्पति तोडफोड गर्ने योजनाकार निरौलाको अध्यक्ष पदको खारेजीका लागि समेत निर्वाचन कार्यलयलाई माग गरेको नगर कमिटीले बिज्ञप्तिमा उल्लेख गरिएको छ ।
