चाडबाड नजिकिंदै गर्दा धनकुटामा न’क्कली नोट छ्यापछ्याप्ती
धनकुटा । चाडबाड नजिकिँदै गर्दा धनकुटामा नक्कली नोट छ्यापछ्याप्ती पाउन थालेको छ । गएराती प्रहरीले नक्कली नोटसहित एक युवालाई पक्राउ गरेसँगै धनकुटामा नक्कली नोटको छ्यापछ्याप्ती पाउन थालेको पाइएको हो ।
प्रहरीले सोमबार राती ९ बजेतिर धनकुटा नगरपालिका वडा नं. ९ मुलघाटमा चेकजाँचको क्रममा धनकुटा हिलेका एक युवकलाई १ हजारका दरका २८ हजार नक्कली नोटसहित पक्राउ गरेको छ ।
प्रहरीले बरामत गरेको सबै नोट हजारका छन् भने सबै नोट एकै नम्बरका छन् । प्रहरीले भने पक्राउ परेका ती युवकको पहिचान खुलाएको छैन । प्रहरी चेकजाँचको क्रममा ती युवकले नक्कली नोट अर्काे गोजीमा हाल्न खोज्दा प्रहरीले सबै नोट चेकजाँच गरेको र सोही क्रममा नक्कली नोट फेला पारेको प्रहरी स्रोतले जनाएको छ ।
प्रहरीले बरामद गरेको सबै नक्कली नोट हेर्दा सक्कली जस्तै देखिन्छ । ती नोट सर्वसाधारणले हेर्दा छुट्याउन नसकिने छ । प्रहरीले बरामद गरेको नक्कली नोट हल्का पातलो र खस्रो देखिन्छ ।-निशान न्यूजको सहयोगमा
