निजी शिक्षा क्षेत्रमा गुणस्तर बृद्धिको लागि अझै धेरै कामहरु गर्न बाँकी : अध्यक्ष पौडेल
धनकुटा । राष्ट्रिय निजी तथा आवासीय विद्यालय एशोसिएसन नेपाल नेश्नल प्याब्सन को सातौँ राष्ट्रिय महाधिवेशन एवम् दोस्रो प्रदेश अधिवेसनबाट प्रदेश नं १ को अध्यक्ष पदमा निर्वाचित धनकुटाका राजन पौडेलले आफुलाई सहयोग गर्ने सदस्य विद्यालयका संस्थापक तथा प्रिन्सिपलहरुलाई धन्यवाद ज्ञापन गर्नुभएको छ ।
धनकुटामा लामो समयदेखि शिक्षा क्षेत्रमा क्रियाशिल पौडेल धनकुटा इङलिस सेकेण्डरी बोर्डिङ स्कुलका संस्थापक हुनुहुन्छ । नेश्नल प्याब्सन धनकुटाका संस्थापक अध्यक्ष रहेर २ कार्यकाल जिल्ला अध्यक्ष समेत भईसक्नुभएका उहाँले समग्र निजी विद्यालयको गुणस्तर बृद्धि धनकुटा जिल्लाकै शैक्षिक गुणस्तरको बृद्धिमा उल्लेखनीय काम गर्नुभएको छ ।
देश संघिय शासन ब्यवस्थामा गएपछि परिवर्तन भएको नेश्नल प्याब्सनको विधान अनुसार प्रदेश १ को संस्थापक सचिवको जिम्वेवारी कुशलता पुर्वक निर्वाह गरिसक्नुभएका पौडेल केन्द्र देखि स्थानीय तहसम्मका सबै शैक्षिक नेताहरूले रूचाएका, सरल र मिजासिलो स्वभाव, कुशल संगठन शैली र निजी क्षेत्रका अग्रणी ब्यक्तिको पहिचान बनाई सक्नुभएको छ ।
पौडेललाई जिताउन सहयोग गर्ने नेश्नल प्याब्सन धनकुटा अध्यक्ष दिनेश भण्डारी लगायत सम्पूर्ण जिल्ला समिति पदाधिकारी तथा सदस्यहरुलाई उहाँले धन्यबाद ज्ञापन गर्नुभएको छ ।
पौडेलले निजी शिक्षा क्षेत्रमा गुणस्तर बृद्धिको लागि अझै धेरै कामहरु गर्न बाँकी रहेको बताउनुभएको छ । उहाँले समग्र शैक्षिक क्षेत्रमा सुधारका लागि सबै पक्षको सहयोगको अपिल गर्दै आफुले निरन्तर काम गर्ने प्रतिबद्दता समेत व्यक्त गर्नुभएको छ ।
