पत्रकार महासंघको ६७ औं स्थापना दिवस धनकुटामा यसरी मनाइयो
धनकुटा । आज नेपाल पत्रकार महासंघको ६७ औं स्थापना दिवस विभिन्न कार्यक्रम गर्दै मनाईएको छ ।
दिवसको अवसरमा धनकुटाका दुईजना सञ्चारकर्मीले नेपाल पत्रकार महासंघ जिल्ला शाखा धनकुटाले स्थापना गरेको पत्रकार कल्याणकारी कोषमा आर्थिक सहयोग गरेका छन् ।
नेपाल पत्रकार महासंघ जिल्ला शाखा धनकुटाका उपाध्यक्ष एवं रेडियो नेपाल धनकुटामा व्यापार अधिकृत पदमा कार्यरत देवकला कार्की र शाखाका प्रदेश पार्षद एवं कान्तिपुर दैनिकका उपसम्पादक रमेशचन्द्र अधिकारीले जनही १० हजार ५ सय ५५ रुपैया आर्थिक सहयोग प्रदान गरेका हुन् ।
स्थापना दिवसको अवसरमा आयोजित कार्यक्रममा दाता कार्कीले पत्रकारहरुको कल्याणका लागि सहयोग पुगोस भनेर सहयोग रकम प्रदान गरेको बताउनुभयो ।
त्यस्तैगरी अर्का दाता अधिकारीले पत्रकार कल्याणकारी कोष मार्फत सवै पत्रकारलाई सेवा पुर्याउन र थप अरुवाट पनि सहयोग रकम संकलन होस् भन्ने उद्येश्यले कोषमा आर्थिक सहयोग गरेको वताउनुभयो ।
महासंघ धनकुटाले स्थापना दिवसको अवसरमा धनकुटा नगरको भीमनारायण चौकवाट मदन चौक सम्म प्रभातफेरी सम्पन्न गरेको थियो । प्रभातफेरी पछि जिल्ला अस्पताल धनकुटा र धनकुटा मोडेल अस्पतालका विरामीहरुलाई फलफुल वितरण गरिएको पत्रकार महासंघ धनकुटाका अध्यक्ष नगेन्द्र राईले जानकारी दिनुभएको छ ।
शाखाका अध्यक्ष नगेन्द्र राईको अध्यक्षतामा सम्पन्न कार्यक्रममा महासंघका केन्द्रीय सदस्य सरिता वराईली राई लगायतकाले मन्तव्य राखेका थिए ।
