आठपहरियाहरुलाई ऋण मुक्त गराई बन्धकी जमिन फिर्ता गरिदिने
नारायण कुमार राई/धनकुटा, २५ बैशाख । नेकपा एमालेको तर्फबाट धनकुटाको नगरपालिकाको मेयरका उम्मेद्वार चिन्तन तामाङले आठपहरिया जातिहरुले बन्धक(दृष्टिबन्धक) राखेको जमिन फिर्ता गर्ने घोषणा गरेका छन् ।
आईतबार धनकुटा बजारमा चुनावी अभियान गरेर भोट माग्ने क्रममा तामाङले आफूले चुनाव जितेमा आठपहरीया जातिहरुले बिभिन्न समयमा ब्यक्तिहरु संग पूर्जा राखेर लिएको ऋण तिरिदिएर लालपूर्जा उनीहरुको हातमा फर्काईदिने जानकारी दिएका छन् ।
यस अधि मेयर रहेकै बेला एक कार्यक्रमका समयमा उक्त घोषणा गरेका तामाङले उक्त कुरालाई आफ्नो चुनावी घोषणामा समेत समावेश गरेका छन् ।
‘आठपहरिया समुदायको दृष्बिन्धक हटाउन जमिन फुकुवा गराई भूस्वामित्वको संरक्षण गर्न ठोस योजना सहित कार्य गरिनेछ ।’–घोषणा–पत्रमा उल्लेख छ ।
‘हो,यो घोषणा मैले अहिले चुनावमा मात्र हैन,म मेयर भएको समयमा बनाएको योजना अनुसार आठपहरिया जातिको बन्धकी जमिन फिर्ता गर्ने योजना हो ।’–तामाङले भने ।
धनकुटा नगरपालिकामा मात्र पाईने भनिएको आठपहरिया जातिका नगरको वडा नं.८ मा मात्र एक सय घरपरिवारको जमिन दृष्टिबन्धकका रुपमा अरुका घरमा लालपूर्जा रहेको एमालेका तर्फबाट वडा अध्यक्षको उमेद्वार रहेको रसबहादुर राईले जानकारी दिए ।
