धनकुटा जिल्ला हुँदै बग्ने तमोर नदीमा आज र भोली नदीको बहाव उल्लेख्य बढ्ने बाढी पूर्वानुमान महाशाखाको भनाइ
धनकुटा,१५ असार । सोमबार देखि परेको लगातार बर्षाका कारण धनकुटा जिल्ला हुँदै बग्ने तमोर नदीमा पनि आज र भोली नदीको बहाव उल्लेख्य बढ्ने जल तथा मौसम विज्ञान विभाग बाढी पूर्वानुमान महाशाखाले जनाएको छ ।
आज जारी गरेको बुलेटिनमा प्रदेश १ का झापा, मोरग, सुनसरी, धनकुटा र इलाम जिल्ला लाई महाशाखाले बाढीको उच्च जोखिमको जिल्लामा राखेको छ ।
तमोर , कन्काई, कमला, बागमती, पूर्वी राप्ती, तिनाउ, पश्चिम राप्ती, बबई, नारायणीका नदीहरू सेती, कालिगण्डकी, मादीमा ठूलो बाढी आउने सम्भावना रहेको बाढी पूर्वानुमान महाशाखाले जनाएको छ।यी नदीमा बुधबार र बिहीबार वहाब उल्लेख्य बढ्ने र सतर्कता आसपास पुग्न सक्ने भएकाले सम्बन्धित क्षेत्रका बासिन्दालाई सतर्कता अपनाउन आग्रह गरिएको छ।
बेँसीशहर – चामे सडक अवरुद्ध
लमजुङ, १५ असार /लगातारको वर्षाका कारण मनाङ जाने एक मात्र सडक बेंसीसहर-चामे खण्ड अवरुद्ध भएको छ ।
बेंसीशहर नगरपालिका-६ उत्तीसघारीको खरखरेमा पहिरो गएको छ । पहिरोका कारण मर्स्याङ्दी गाउँपालिका-९, खुदीवारिको घनपोखरा र लामागाउँ जाने सडक अवरुद्ध भएको छ । खुदीबजारबाट गाउँपालिकातर्फ जाने सडक माथिल्लो मर्स्याङ्दी ‘ए’ को वारिपट्टी पनि पहिरो गएको छ । मनाङतर्फ म्यार्दी भिरमा पहिरो गएपछि सडक अवरुद्ध भएको छ ।
डुम्रे–बेंसीशहर–चामे सडक योजना प्रमुख इन्जिनियर अच्युतविलास पन्तका अनुसार मंगलबार साँझदेखिको वर्षाका कारण मनाङ जोड्ने सडक ठाउँठाउँमा पहिरोले क्षति पुर्याएको छ ।
मनाङतर्फको बाटो खुलाउने प्रयास भइरहेको लमजुङका प्रमुख जिल्ला अधिकारी सुशिल वैद्यले बताए ।
