सहिदभूमि गाउँपालिकामा छिन्ताङ, छिलिङ र बान्तवा भाषाको पांच दिने शिक्षक प्रशिक्षण कार्यक्रम सम्पन्न
धनकुटा । सहिदभूमि गाउँपालिका धनकुटामा छिन्ताङ, छिलिङ र बान्तवा भाषा शिक्षक प्रशिक्षण कार्यक्रम सम्पन्न भएको छ । किरात राई यायोक्खा जिल्ला कार्यसमिति धनकुटाको आयोजमा तथा सहिदभूमि गाउँपालिकाको सहयोगमा ५ दिन सम्म सञ्चालन भएको प्रशिक्षण कार्यक्रम बुधबार सम्पन्न भएको हो ।
उक्त प्रशिक्षण कार्यक्रममा गाउँपालिका भित्रका छिन्ताङ, छिलिङ र बान्तवा भाषा पढाउने ८ वटा विद्यालयका शिक्षकहरुको सहभागिता रहेको थियो । कार्यक्रममा सहभागी शिक्षकहरुलाइ भाषाविद पदम वालाहाङ राईले सहजिकरण गर्नु भएको थियो ।
प्रशिक्षणका क्रममा भाषाविद राइले मातृभाषा शिक्षण सिकाईको विषयमा कसरी आफै शैक्षिक सामाग्री निर्माण गर्ने , पाठ्यपुस्तक तयार नभएको अवस्थामा कसरी पढाउने भन्ने विषय लगायत शिक्षकहरुको क्षमता विकास सम्बन्धि प्रशिक्षण दिनुभएको थियो ।
हाल सहिदभूमि गाउँपालिकामा ८ वटा विघालयमा कक्षा ३ सम्म पढाउने व्यवस्था गरेको छ । मातृभाषा शिक्षकहरु जम्मा गाउँपालिकामा बान्तवा भाषा पढाउने ४ जना , छिलिङ र छिन्ताङे भाषा पढाउने २/२ जना रहेकाछन् । सो ५ दिने मातृभाषा शिक्षक प्रशिक्षण कार्यक्रम प्रदेश संसद निरन राईको प्रमुख आतिथ्यमा समापन गरिएको किरात राई यायाेक्खाका जिल्ला अध्यक्ष नगेन्द्र राईले बताउनुभयो ।
कार्यक्रममा गाउँपालिका अध्यक्ष मनोज राईले गाउपालिका भित्र बोलिने छिलिङ , बान्तवा र छिन्ताङे भाषालाई काम काजी भाषाको रुपमा प्रयोग गर्न अभ्यास भईरहेको बताउनुभयो । साथै उहाले ८ वटा विद्यालयमा शिक्षकहरू नियुक्ति गरेर पठनपाठनको व्यवस्था मिलाईएको जानकारी गराउनु भएको थियो ।
कार्यक्रममा किरात राइ यायोक्खाको केन्द्रिय सद्स्य अस्मिका राई , उपाध्यक्ष रत्नश्वरी राई भाषाविज्ञ प्राध्यापक ईच्छा पुर्ण राई , वडाअध्यक्षहरु लगायत समाजसेवी वुद्विजिवि शिक्षकहरुको उपस्थिति थियो । प्रशिक्षणमा सहभागी सम्पूर्णलाई आयोजक संस्थाको तर्फबाट प्रमाणपत्र समेत वितरण गरिएको थियो ।
