छथरजोरपाटीमा संचालित ४ दिने पत्रकारिता तथा मल्टिमिडिया तालिम आज सम्पन्न
धनकुटा,२१ कार्तिक । रेडियो भेडेटार ८८.१ र ९१ मेगाहर्जको आयोजना तथा छथरजोरपाटी गाउँपालिकाको सहयोगमा शुक्रबारबाट सुरु भएको ४ दिने पत्रकारिता तथा मल्टिमिडिया तालिम आज सोमबार सम्पन्न भएको छ ।
तालिम समापन कार्यक्रममा प्रमुख अतिथि छथरजोरपाटी गाउँपालिकाका अध्यक्ष छत्रबहादुर सुव्बाले अहिलेको २१ औं शताब्दिमा संचारमाध्यमको भूमिका विश्व परिवेशमा नै रहेकोले त्यसबारे जानकारी राख्नु र सिक्नु निकै महत्वपूर्ण बिषय भएको बताउँनु भयो । साथै उहाँले समाज रुपान्तरणको महत्वपूर्ण पक्ष पत्रकारिता रहेको बताउँदै तालिममा सहभागीहरुले सिकेका कुरालाई व्यवहारमा समेत लागु गर्नु पर्ने बताउँनु भयो ।
पत्रकारिताले समाजलाई सत्य तथ्य बुझाउने काम गर्नु पर्ने र पत्रकारितामा पनि समय अनुसारको प्रविधीको अपडेट हुदै जानु पर्ने भएकोले तालिममा सहभागिहरुले त्यो अवसर पाएको बताउँनु भयो ।
कार्यक्रममा बोल्दै प्रमुख प्रशिक्षक एवम् नेपाल पत्रकार महासंघ धनकुटा शाखाका अध्यक्ष नगेन्द्र राईले पत्रकारितामा पछिल्लो समय चुनौती संगै अवसर पनि रहेकोले तालिममा सहभागीहरुले अवसरलाई सदुपयोग गर्दै जानु पर्ने बताउँनु भयो ।
कार्यक्रमको सभापतित्व रेडियो भेडेटार ८८.१ र ९१ मेगाहर्जका उपाध्यक्ष विकास घिमिरेले गर्नु भएको थियो । शुक्रबारबाट सुरु भएको तालिममा संचारमाध्यममा उत्पादन गरिने कार्यक्रम, समाचार लेखन, वाचन , समाचार सम्पादन, रिपोटिङ्ग, टेलिभिजनकाका लागि छायाँकन, भिडियो सम्पादन लगायतका बिषयमा तालिम प्रदान गरिएको आयोजक संस्था रेडियो भेडेटारका स्टेशन म्यानेजर पूर्णकुमार चौधरीले जानकारी दिनु भयो ।
