धनकुटामा विमा कम्पनीहरुले पशु बिमा गरेको दावी भुक्तानी गर्न विभिन्न वहानामा किसानलाई दुःख दिने गरेको गुनासो
धनकुटा । धनकुटाका कृषकहरुले कुनै कुनै विमा कम्पनीहरुले बिमा गरेको दावी भुक्तानी गर्न विभिन्न वहानामा किसानलाई दुःखदिने गरेको गुनासो गरेका छन ।
धनकुटाका किसानहरुलाई पशु बिमा सम्बन्धि जानकारी दिने लक्षका साथ धनकुटामा सञ्चालित अभिमुखिकरण कार्यक्रमका सहभागि किसानहरुले त्यस्तो गुनासो गरेका हुन् ।
भेटेरीनरी अस्पताल तथा पशुसेवा विज्ञ केन्द्र धनकुटाको आयोजनामा कार्यक्रम सञ्चालन गरिएको हो । उनीहरुले पशुबिमा गरेका कृर्षकहरुलाई विना झनझट दावि भुक्तानी दिनु पर्नेमा जोड दिएका छन ।
कार्यक्रममा सहभागि सरोकारवाला निकायका प्रतिनिधिहरुले किसानहरुलाई सेवाप्रदान गर्न विमा कम्पनीहरुलाई आग्रह गरेका छन ।
भेटेरीनरी अस्पताल तथा पशु सेवा विज्ञ केन्द्र धनकुटाका प्रमुख लोकनाथ ढुंगनाको अध्यक्षतामा सम्पन्न कार्यक्रममा जिल्ला सहकारी संघ धनकुटाका अध्यक्ष खगेन्द्र सुवेदी, कृषि विकास बैकका प्रमुख केदार प्रसाद धिताल, नेपाल पत्रकार महासंघ धनकुटाका उपाध्यक्ष विदुर खवास, जिल्ला बंगुर व्यवसायी संघका अध्यक्ष रुजन राई, विमा कम्पनीका शाखा प्रमुखहरु, सञ्चारकर्मी तथा जिल्ला स्थित सरोकारवाला तथा किसानहरुको उपस्थीती रहेको थियो ।
