१४८ किसानलाई प्रोत्साहन रकम
नारायण कुमार राई/धनकुटा,१५ बैसाख । धनकुटा नगरपालिका वडा नं.३ को श्री सहकारीले आफ्नो संस्थामा आवद्ध एक सय ४८ दुग्ध उत्पादक किसानहरुलाई प्रोत्साहन रकम बितरण गरेको छ ।
कोशी पदेश सरकारले अनुदान स्वरुप उपलब्ध गराएको उक्त रकम पशु सेवा कार्यालय धनकुटा मार्फत् दिईएको हो ।
संस्थाले शुक्रबार एक हस्तान्तरण कार्यक्रम गरेर गएको साउन देखि पाँच महिना सम्म दुध संकलन गर्ने किसानहरुलाई प्रति लिटर रु दुई रुपैंयाका दरले एकमुष्ट रकम बितरण गरेको छ ।
किसानहरुलाई प्रदेश सभासद निरन राई,धनकुटा नगरपालिकाकी उपमेयर भिमादेवी खनाल,पशुसेवा कार्यालय धनकुटाका प्रमुख लोकनाथ ढुंगानाले रकम प्रदान गर्नुभएको थियो । प्रोत्साहन रकमले किसानहरुलाई दुध उत्पादन गर्न थप हौसला मिलेको संस्थाका अध्यक्ष खेमराज थापाले बताउनुभयो ।
किसानहरुले न्युनतम दुईहजार देखि १० हजार पाँच सय सम्म प्रोत्साहन रकम पाएको संस्थाकी सचिव रामकुमारी राई रोजाले जानकारी दिनुभयो । संस्थामा सबैभन्दा बढी पाँच हजार दुई सय लिटर दुध जम्मा गरेर कृषक राजु कटुवालले १० हजार पाँच सय ४६ रुपैंया प्रोत्साहन रकम पाउनुभएको छ ।
