पाख्रीवासमा एक महिलाको अचानक निधन
धनकुटा । धनकुटाको पाख्रीवास नगरपालिका वडा नं ८ मा एक जना महिलाको अचानक निधन भएको छ ।
मंगलवार दिउँसो बाख्रालाई चर्न जंगलतिर छाडेको केही समयपछि पानी पर्न थालेपछि बाख्रा खोज्न निस्कनुभएकी पाख्रीवास ८ जोखेडाँडाकी ५७ वर्ष की सावित्रा राईको निधन भएको हो ।
घरदेखी केही पर जंगलमा रहेको चौतारामा उहाँको श्रीमानले साँझपख मृत अवस्थामा उहाँलाई फेला पारेको वडा नं ८ का वडाध्यक्ष गजेन्द्र राईले बताउनुभयो । पानी पर्न थालेपछि बाख्र खोज्न निस्कनु भएकी सावित्रा साँझपख सम्म पनि घरमा नआएपछि उहाँको श्रीमान खाज्न जानु भएको वडाध्यक्ष राईले बताउनुभयो ।
राईको निधनको खास कारण भने खुलेको छैन । आफन्तका अनुसार उहाँ बाख्रा खोज्न निस्केको समयमा बसेको चौताराको एक खम्बा चट्याङले चिरेको पाईएको छ ।
यता पाख्रीवास आधारभुत अस्पतालका डा. अंकित शर्माले भने स्व. राईको शरिरमा त्यस्तो कुनै चोटपटक नदेखिएको बताउनुभएको छ । प्रहरीले पनि स्व. राईको शरिरमा कुनै चोट नदेखिएको जनाएको छ ।
