‘तामाङ र मगर समुदायको आन्दोलनमा भएको दमन अमानवीय’ : नेफिन, लिम्बुवान नागरिक समाज यूके
लन्डन । नेपालका आदिवासी तामाङ, मगर र अल्पसंख्यक समुदायकाे आन्दोलनमाथि भएको दमनबारे यूकेका संस्थाहरूले पनि धारणा अघि सारेका छन् । नेपाल आदिवासी जनजाति महासङ्घ(नेफिन) यूकेले राज्यले समुदायको आन्दोलनमा गरेको दमनकाे निन्दा गर्दै अमानवीय हर्कत भएको बताएकाे छ ।
बुधबार विश्व आदिवासी दिवसकाे अवसर पारेर शुभकामना सन्देशसँगै प्रेस वक्तव्य जारी गर्दै नेफिन यूके अध्यक्ष कमानसिङ(कर्म पहाडी) शेर्पाले आदिवासी तामाङ र मगर समुदायको आन्दोलनप्रति आफ्नो ध्यानाकर्षण भएको जनाएका छन् । उनले अधिवक्ता भगवती पाण्डेकाे अभिव्यक्तिले समुदायको आत्मसम्मान र साँस्कृतिक मान्यतामा आघात पुगेको जनाएका छन् । गत साउन १७ र २२ गते भएको प्रदर्शनीमा निर्मम दमन गर्ने, अभियन्ताहरूलाई पक्राउ गर्ने, हिरासतमा यातना दिने, महिलाहरूमाथि दुर्व्यवहार गर्ने कार्यकाे समेत विराेध गरेका छन् । नेफिन यूकेले अधिवक्ता पाण्डेलाई पक्राउ गर्न र आन्दोलनमाथि दमनकाे नेतृत्व गर्ने एसएसपी दान बहादुर कार्की लगायतका अधिकृतलाई निलम्बन गर्न समेत माग गरेको छ ।
नेफिन यूकेले प्रदेश नम्बर एककाे पुनः नामाङकन आन्दोलनमा समेत ऐक्यबद्धता जाहेर गर्दै प्रदेशहरूकाे नाम पहिचानका आधारमा पुनः नामकरण हुनुपर्ने माग गरेको छ ।
यस्तै, लिम्बुवान नागरिक समाज यूकेले समेत मगर, तामाङ र।मुस्लिम समुदायको आन्दोलनमा भएको दमनलाई अलाेकतान्त्रिक र अमानवीय कामकाे संज्ञा दिएको छ । समाजका अध्यक्ष छत्र वनेम र सचिव लाहाङ चेम्जोङले विज्ञप्ति जारी गर्दै आन्दोलनरत समुदायको माग तत्काल सम्बाेधन गर्न नेपाल सरकारसमक्ष माग गरेको छ । उसले आन्दोलनकारीहरूलाई नियन्त्रणमा लिएर लाेकतन्त्र र मानवअधिकारकाे खिलापमा गएको बताएको छ ।
गत साउन ७ गते प्राइभ टेलिभिजनमा एक अन्तर्वार्ता दिँदै अधिवक्ता पाण्डेले आदिवासी तामा, मगर र अन्य सिमान्तकृत समुदायको वैवाहिक संस्कारविरुद्ध अभिव्यक्ति दिएका थिए । जसले सम्बन्धित समुदायहरूलाई आन्दोलित बनाएपछि उजुरी दिएका थिए । उजुरी दिएपनि प्रहरीले पक्राउ नगरेपछि आन्दोलनकारीहरू साउन १७ गते टेकु प्रहरी परिसरअघि विराेध प्रदर्शनमा उत्रँदा व्यापक दमन भएको थियोे । जुन कार्यकाे धेरै क्षेत्रबाट विराेध भएको थियोे ।
प्रधानमन्त्री पुष्पकमल दाहालले बुधबार काठमाडौंमा नेफिन नेपालद्वारा आयाेजित कार्यक्रमलाई सम्बाेधन गर्ने क्रममा पाण्डे दाेषी देखिए पक्राउ गर्ने प्रतिबद्धता व्यक्त गरेका थिए ।
