सीआईबीले दियो कांग्रेस सांसद शर्मा पक्राउबारे संसद सचिवालयलाई जानकारी
काठमाडौं । नेपाली कांग्रेसका सांसद सुनिल शर्मा पक्राउबारे नेपाल प्रहरीको केन्द्रीय अनुसन्धान ब्यूरो (सीआईबी)ले संघीय संसद सचिवालयलाई जानकारी गराएको छ ।
सीआईबीले सांसद शर्मालाई पक्राउ गरिएकोबारे जानकारी समेटिएको पत्र संसद सचिवालय सिंहदरबार पठाएको हो ।
सीआईबीले कीर्ते कागजातमा अनुसन्धानका लागि सांसद शर्मालाई बिहीबार दिउँसो उनकै निवास गोल्फुटारबाट पक्राउ गरेको थियो ।
कुनै सांसद फौजदारी अभियोगमा पक्राउ परेमा सभामुखलाई तत्कालै जानकारी दिनुपर्ने संवैधानिक व्यवस्था छ ।
भारतको एक संस्थाबाट जारी भएको भनिएको प्रवीणता प्रमाणपत्र तहको शैक्षिक योग्यताको नक्कली प्रमाणपत्रका आधारमा उनले चीनबाट एमबीबीएस अध्ययन गरेको भन्दै अनुसन्धानका लागि पक्राउ गरिएको सीआइबीले बतायो ।
