पाख्रीवास ८ छेङ्गुवा खोलामा झोलुङ्गे पुल निर्माण गरिने
शर्मिला राई,धनकुटा । धनकुटाको पाख्रीवास नगरपालिका वडा नं ८ छेङ्गुवा खोलामा झोलुङ्गे पुल निर्माण गरिने भएको छ । पाख्रीवास नगरपालिका र संघिय सरकारको संयुक्त लगानिमा झाेलुङ्गे पुल बनाईदै गरेको हो ।
क्रमागत योजना अन्र्तगत ६३ लाख ३५ हजार बराबर लागतमा पुल निर्माण भईरहेको पाख्रीवास नगरपालिकाका प्रमुख ज्ञान बहादुर गुरुङले बताउनु भएको छ । पुल बनेपछि त्यस क्षेत्रका ३ सय ६९ घरधुरीका १ हजार ८ सय ५४ जनसंख्यालाई आवत जावतमा सजिलो हुने उहाँले बताउनु भयो ।
हालसम्म पुलको जग बसाल्ने, पिलर उठाउने, वारिपारी लठ्ठा टाग्ने लगायतका काम भएको अनुगमनकाे क्रममा पाईएको पाख्रीवास नगरपालिका वडा नं ८ का वडाध्यक्ष गणेश राईले जानकारी दिनुभयाे । सम्झौता अनुसार २०८२ सम्म पुलको निर्माण कार्य सक्नुपर्ने भएपनि आम नागरिकको सुविधालाई मध्यनजर गरि छिट्टै सक्ने गरि काम भईरहेको उहाँले बताउनुभयो ।
निर्माणाधिन पुलको अहिलेसम्म करिब ४५ प्रतिशत काम सकिएको पुल निर्माणको जिम्मा पाएको उपभोक्ता समितिले जनाएको छ । झोलुङ्गे पुल निर्माणका लागि आवश्यक स्थानिय निर्माण सामाग्री संकलनको व्यवस्था उपभोक्ता समितिले नै गर्नुपर्ने छ भने समुदायको दुई प्रतिशत योगदान प्राप्त नगद जिन्सी अनुदान र अन्य थप निर्माण कार्यहरु प्राप्त अनुदानबाट गर्ने सम्झौता अनुसार आवश्यक ढुवानी तथा भण्डारणको व्यवस्था समेत समितिबाटै हुने उल्लेख छ ।
