सप्तऋषिको विधिपूर्वक पूजाआराधना गरेर बिदा गरियो तीज
धनकुटा । भाद्र शुक्ल पञ्चमीका दिनमा मनाइने ऋषि पञ्चमी पर्व आइतबार धनकुटामा समेत ऋषिको पूजा आराधना गरी मनाइएको छ । धनकुटाको मूलघाट सहितका विभिन्न स्थानमा रहेका मन्दिर तथा घरघरमा ऋषि पञ्चमी पर्वको अवसरमा पुजा आरधाना गरिएको हो ।
महिलाले आज बिहानै उठेर नजिकको नदी, खोला, ताल, तलैया र पोखरीमा गई ३ सय ६५ दत्तिवनले दाँत माझ्ने, गाईको गोबर, माटो र खरानी लगाई स्नान गर्ने गर्दछन् ।रजस्वलाका समयमा छाइछुइलगायत कुनै त्रुटि भए आज ऋषि पञ्चमीको दिन अरुन्धतीसहित सप्तऋषिको पूजा गर्नाले मुक्ति मिल्ने धार्मिक विश्वास छ ।
नारीलाई रजस्वलाको तीन दिनसम्म छुन नहुने तथा त्यस अवधिभर विभिन्न संज्ञा दिइने र चौथो दिन स्नान गरी शुद्ध हुन्छिन् भन्ने विश्वास गरिन्छ । हरितालिका तीज पछि ऋषि पञ्चमी पर्व मनाइने गरिएको छ ।
