धनकुटाको साँगुरीगढीमा ४ करोडको लगानीमा बृहत् लिफ्टीङ खानेपानी आयोजनाको शिलान्यास
धनकुटा,१३ बैशाख । धनकुटाको साँगुरीगढी गाउँपालिकामा बुढिमोरङ का ४ सय ६४ घरधुरी लाभान्वित हुने गरि बृहत् लिफ्टीङ खानेपानी आयोजनाको शिलान्यास गरिएको छ ।
आउँदो असारमा सम्पन्न हुने ४ करोड ४९ लाख रुपैयाँँ लागतको आयोजनाबाट साँगुरीगढी गाउँपालिका १ र २ का ४ सय ६४ घरधुरी लाभान्वित हुनेछन् ।
साँगुरीगढी २ को तुमबारीमा निर्माणाधिन १ लाख २५ हजार लिटर क्षमताको ट्याङ्कीबाट स्थानीय गैरीगाउँ, दानावारी, तम्फूवा, तुम्बारी टोल, कमुवा, तोरीबारी, दुर्गाचोक लगायत स्थानमा बितरण हुनेछ । प्रतिसेकेन्ड ५.२२ लिटर पानी आपूर्ति हुने आयोजनाको मुख्य मुहान कमुवा खोलामा छ ।
उक्त खोलाबाट लिफ्टीङ प्रविधि मार्फत २.९ किलोमिटर माथी पुर्याइने छ । विभिन्न स्थानमा २ वटा पम्पिङ स्टेशन रहने आयोजनाका लागि १८ किलोमिटर बितरण पाइप बिस्तार हुने संघीय खानेपानी तथा ढल ब्यबस्थापन कार्यालय धनकुटाका प्रमुख भोलाप्रसाद थापाले जानकारी दिए ।
कार्यक्रममा पूर्वखानेपानी मन्त्री तथा धनकुटाका संघिय सांसद राजेन्द्र कुमार राई, साँगुरीगढी गाउँपालिकाका अध्यक्ष जितेन्द्र राई लगायतको सहभागिता रहेको थियो ।
