धनकुटाको पाख्रीवासमा यसरी मनाइयो साकेला उभौली चाड (भिडियो सहित)
धनकुटा,३ जेठ । धनकुटाको पाख्रीवासमा आज भव्य रुपमा साकेला उभौली चाड मनाइएको छ ।
किरात राई यायोक्खा पाख्रीवास नगर कार्य समितीको आयोजनामा बृहत् साँस्कृतिक कार्यक्रम सहित साकेला उभौली चाड मनाइएको हो ।
प्रकृति पूजक यो समुदायले साकेला थानमा पूजा आराधना गर्दै साकेला नृत्य नाच्दै यो चाड मनाउने गरेका छन् ।
कार्यक्रमलाई सम्बोधन गर्दै पूर्व खानेपानी मन्त्री तथा संघिय सांसद राजेन्द्र कुमार राईले विभिन्न जातजातिको कला, संस्कृतिको विकासलाई व्यवस्थित ढंगले अघि बढाउन आवश्यक रहेको बताउनु भयो । जसका लागि किरात राई यायोक्खाले भुमिका खेलिरहेको उहाँको भनाइ छ ।
समितिका नगर अध्यक्ष जितेन्द्र माङपाहाङको अध्यक्षतामा सञ्चालित कार्यक्रममा सांसद राईले यो संस्थाले शिक्षा,स्वास्थ्य सहित आर्थिक क्षेत्रलाई समेत लक्षित गरेर कार्यक्रमहरु गर्न सुझाव दिनु भयो ।
स्थानिय जनप्रतिनिधीहरु सहित विभिन्न संघ संस्थाका प्रमुख एवं प्रतिनिधि,जिल्ला समन्वय समितिका उप प्रमुख साबित्रा राई,प्रदेश सांसद निरन राई,किरात राई यायाेक्खाका केन्द्रिय सचिव अस्मिका राई, जिल्ला अध्यक्ष उद्ववमणी राई लगायतको उपस्थिती रहेको कार्यक्रमको सञ्चालन किराया नगर समितीका सचिव चकेन्द्र राईले गर्नु भएको थियो ।
