धनकुटाका सात मध्ये साँगुरीगढीको बेरुजु सबैभन्दा कम,कुन पालिकाको कति ?
धनकुटा । धनकुटाको साँगुरीगढी गाउँपालिमा धनकुटाका अन्य स्थानियतह मध्ये सबै भन्दा कम बेरुजु देखिएको छ । साँगुरीगढी आर्थिक पारदर्शीताका हिसाबले धनकुटाका अन्य पालिका भन्दा अगाडि देखिएको हो ।
महालेखा परीक्षकको कार्यालयले हालै सार्वजनिक गरेको ६२ औं प्रतिवेदन अनुसार साँगुरीगढीको आर्थिक वर्ष २०८०÷०८१ को महालेखाको प्रतिवेदन अनुसार ८९ करोड ८८ लाख ४५ हजारको लेखापरिक्षण गर्दा ३७ लाख, ५३ हजार अर्थात कुल लेखा परिक्षण भएको रकमको ०.४० प्रतिशत मात्र प्रतिवेदनमा बेरुजु देखिएको छ ।
त्यस्तै धनकुटाका सात स्थानियतह मध्ये सबै भन्दा बढी बेरुजु छथर जोरपाटी गाउँपालिकाको देखिएको छ । छथर जोरपाटीको लेखा परिक्षण गरिएको ९५ करोड ७४ लाख, आठ हजार मध्ये २ करोड ८९ लाख ४८ हजार बेरुजु देखिएको छ । जुन कुल लेखापरिक्षण गरिएको रकमको ३.०२ प्रतिशत हो । त्यस्तै सहिदभूमी गाउँपालिकाको १ अर्ब ४ करोड २९ लाख २० हजारको लेखापरिक्षण गरिएकोमा एक करोड ६१ लाख रुपैयाँ अर्थात १.५४ प्रतिशत रकम बेजुरु देखिएको हो । धनकुटा नगरपालिकाको १ करोड ४७ लाख ५१ हजार रुपैयाँ बेरुजु देखि छ । जुन लेखा परिक्षण गरिएको रकमको १.११ प्रतिशत हो ।
त्यस्तै चौबिसे गाउँपालिकाको लेखा परिक्षण गरिएको कुल रकमको ०.६८ प्रतिशत रमक बेरुजु देखिएको छ । चौबिसेको ८६ करोड १० लाख ३६ हजारको लेखापरिक्षण गरिएको छ । पाख्रिवास नगरपालिकाको २ करोड ६८ लाख १७ हजार रुपैयाँ बेरुजु रहेको छ । महालक्ष्मी नगरपालिकाको २ करोड २ लाख ८२ हजार रुपैयाँ बेरुजु देखिएको महालेखाको प्रतिवेदनमा देखिएको छ ।
