इलाममा सडकबाट खसेर ट्रक दुर्घटना
इलाम । इलामको रोङ गाउँपालिकास्थित मेची राजमार्गमा सडकबाट खसेर ट्रक दुर्घटना भएको छ ।
आज बिहान ७ः१५ बजे रोङ गाउँपालिका ४ स्थित मेची राजमार्गमा झापाबाट इलामतर्फ जाँदै गरेको प्र १–०१–००१ च १२५२ नं. को किराना सामान बोकेको मिनी ट्रक ब्रेक फेल भई सडकदेखि करिब ५०० मिटर तल खसेर दुर्घटना भएको हो ।
दुर्घटनामा मिनी ट्रकका सहचालक झापा बुद्धशान्ति –५ बस्ने ४१ वर्षीय कुमार श्रेष्ठ घाइते भएका छन् । ट्रक चालक झापा मेचीनगर –१५ ज्यामिरगढी बस्ने ४१ वर्षीय राजेन्द्र मुखियालाई प्रहरी चौकी किटेनीले नियन्त्रणमा लिएको छ ।
ट्रक घटनास्थलमै रहेको र निकाल्ने पहल भइरहेको इलाम प्रहरीले जनाएको छ|-स्रोत: प्रतिदिन दैनिक
