धनकुटाको भेडेटारबाट १० किलो गांजा सहित गाडी चालक पक्राउ,गांजा बोक्ने ब्यक्ति फरार
धनकुटा,७ जेठ । धनकुटाको भेडेटारबाट लागुऔषध गांजा सहित बोलेरो चालक पक्राउ परेका छन् ।
आज करिब १ बजे इलाका प्रहरी कार्यालय भेडेटारबाट भेडेटार चोकमा खटिएको चेकिङ्ग टोलीले भोजपुरबाट धरानतर्फ जाँदैगरेको को १ ज ३१६२ नम्बरको यात्रुबाहक बोलेरो गाडीलाई जाँच गर्दा गाडीको छतमा राखी लैजाँदै गरेको जेब्रा झोलाभित्र लागुऔषध गाँजा १० किलो फेला परेको हो ।
उक्त गांजा गाडीमा फेला परेपछि अनुसन्धानको लागि चालक सहिदभूमि गाउंपालिका ६ का ३५ बर्षिया राजेश राईलाई उल्लेखित गाँजा र गाडी सहित नियन्त्रणमा लिई अनुसन्धान भइरहेको जिल्ला प्रहरी कार्यालय धनकुटाका प्रवक्ता डीएसपी ओमप्रकाश खनालले जानकारी दिए ।
प्रारम्भिक अनुसन्धानमा बोलेरोका यात्री भोजपुर जिल्ला पौवादुम्मा गाउँपालिका बस्ने टेकेन्द्र राई भोजपुरको पौवादुम्मा स्थित छेदुवा चोकबाट उक्त गाँजासहित चढेको र भेडेटारमा प्रहरीको चेकिङ देखेपछि फरार रहेको डीएसपी खनालले बताए ।
