झापाको सामुदायिक वनमा एक वृद्ध मृत अवस्थामा फेला
झापा । झापाको हलुवागढ सामुदायिक वनमा दाउरा संकलन गर्न गएका एक वृद्ध मृत अवस्थामा फेला परेका छन्।
अर्जुनधारा नगरपालिका–१ दखलबस्तीका ७० वर्षीय बलबहादुर बसेल शुक्रबार साँझ ५ बजे दाउरा लिन वनतर्फ गएका थिए। घर नफर्किएपछि आफन्त र स्थानीयहरुले खोजतलास गर्दा उनलाई वनभित्र रहेको गैरे खोल्सीमा घोप्टो परेको अवस्थामा मृत फेला पारिएको हो।
घटनाबारे शनिश्चरे प्रहरी चौकीमा आज बिहान ८:१५ बजे सूचना प्राप्त भएपछि प्रहरी नायव निरीक्षक उमेश श्रेष्ठ नेतृत्वको टोली घटनास्थलमा खटिएको थियो।
घटनास्थल सुरक्षित बनाएपछि थप अनुसन्धान र कानुनी प्रक्रिया अघि बढाउन इलाका प्रहरी कार्यालय बिर्तामोडबाट प्रहरी निरीक्षक सन्तोष राईको नेतृत्वमा थप टोली पठाइएको जनाइएको छ।
